Aqtóbe oblysynyń «Atameken» kásipkerler palatasynda «Bastaý» jobasynyń 71 túlegi óz bıznes josparlaryn qorǵady. Bul - osy jylǵy jobanyń sońǵy 6-legi boıynsha kásipkerlik bilim alǵan jandar.
Osy topta oblys boıynsha 580 adam oqyǵan. Bastapqyda kásipkerlik oqýlaryn aýyl adamdarynyń arasynda ótkizý kózdelgen bolatyn, alaıda bıyl olardyń qataryna 109 qala turǵyny da qosyldy.
Baǵdarlama boıynsha kásipkerlik bilim alǵan jandardyń biri - Aqtóbe qalasy mańyndaǵy Qýraıly eldi mekeniniń turǵyny Erlan Aıtekenov. Osyǵan deıin ol qaladaǵy kólik jóndeý stansıalarynda mehanık bolyp jumys jasapty. «Bastaý» jobasy arqyly bıznesti júrgizýdi úırenýge bolady degendi estip, kásipkerlik sabaqtaryna qatysýdy uıǵarypty. Jaqyn arada óz aýylynda jol boıyndaǵy kólik jóndeý qyzmetin ashpaq. Búgingi kúni joba jattyqtyrýshylarynyń kómegimen bıznes-jospar jasap, memleketten kólik jóndeý keshenin salýǵa arnalǵan jer telimin aldy. Baǵdarlama kómegimen qurylys jumystaryna «Aýyl sharýashylyǵyn qoldaý qorynan» 6 mln teńgeni 6% nesıemen alýdy josparlap otyr.
«Kásip bastaýdyń ózindik qyr-syry joq emes eken. Jergilikti jerdegi bıznes ahýaldy zerdelep, jeke kásipkerlikke tirkelýden bastap, salyq tóleý sharttary týraly biraz maǵlumat aldyq. Óz ortalyǵymdy ashsam deımin. Bıznes bilimin alǵan jandarǵa kásip bastaýdyń qıyn emes ekenine kózim jetti. Keleshekte kásibimdi keńeıtip, jol boıyndaǵy kempıng ashý josparymda bar»,-deıdi bolashaq kásipker.
Bıyl oblystaǵy 12 aýdan boıynsha bıznes sabaqtaryna barlyǵy 2 231 adam oqyǵan. Joba boıynsha 6 top 1 aılyq kásipkerlik kýrstarynan ótti. Olardyń 416 –sy memlekettik qoldaý sharalary arqyly 966 646 000 teńge kóleminde nesıe rásimdedi. Sonymen qatar, «Bastaý» jobasyn bitirgen 81 tyńdaýshy 240 000 teńgeni quraıtyn bir rettik arnaıy grantqa qol jetkizdi.
««Atameken» ulttyq kásipkerler palatasynyń bastamasymen júzege asyrylǵan kásipkerlik negizderine oqytatyn «Bastaý» jobasy bıylǵy jumysyn támamdady. «Bastaý» boıynsha bıznes ilimderin oqýǵa suranys kóp boldy, sondyqtan bıyl qala turǵyndaryn da oqytý qolǵa alyndy. Joba boıynsha qatysýshylar kásipkerliktiń 12 modýli boıynsha oqytyldy»-deıdi jobanyń Aqtóbe oblysy boıynsha úılestirýshisi Dıana Jumabaeva.
Eske salsaq, «Bastaý» jobasy «Atameken» ulttyq kásipkerler palatasynyń bastamasymen jáne nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasynyń ekinshi baǵyty aıasynda júzege asyrylýda.
