Jazýshy Oljas Súleımenov Malıka Muhıtovany keshirdi ári Astana sotynan boıjetkenniń bostandyǵyn shektemeýdi surady.
Malıka Muhıtova Oljas Súleımenovtiń nemeresi Eskendir Súleımenov qaıtys bolǵan jol apatyna kináli dep aıyptalyp, 2 jylǵa bas bostandyǵynan aıyrylǵan.
«Eskendir Súleımenovtiń qaıtys bolǵanyna 6 aı ótti. Alaıda týǵandarynyń jarasy eshqashan jazylmaıdy. Nemerem motosıkldiń jolyn bógegen olaq júrgizýshiniń kesirinen qaza tapty. Birneshe aıǵa sozylǵan tergeý osy faktini naqtylap keldi. Aýdandyq sot tergeý qorytyndysyna sáıkes sheshim shyǵardy.
2018 jyldyń 26 jeltoqsanynda isti Astana qalalyq soty qaraıtyn bolady. Súleımenovter otbasynyń úlkeni retinde Joǵary sotqa kináliniń bostandyǵyn shektemeı-aq jazalaýyn suraımyn. Jasy 30-da. Turmys quryp, ana atansyn. Sol kezde Malıka Muhıtova bizdiń qandaı sezimde ekenimizdi túsinetin bolar», - dep jazdy óz hatynda Oljas Súleımenov.
Aıtýynsha, qyzdyń ómirin tas talqan etkennen Eskendir qaıtyp kelmeıdi.
Eske sala ketsek, belgili aqyn, jazýshy Oljas Súleımenovtiń nemeresi 27 jastaǵy Eskendir Súleımenov Astanada jol apatynan kóz jumǵan edi. Jol apaty Máńgilik el – Kereı Jánibek handar kósheleriniń qıylysynda bolǵan. Jas jigit motosıkl júrgizip kele jatqan. Eskendir Súleımenovti Qyzylorda oblysy ishki ister departamentiniń bastyǵy, polısıa polkovnıgi Qaırat Muhıtovtiń qyzy Malıka Muhıtova qaǵyp ketken. 29 jastaǵy Malıka Muhıtova sot otyrysynda marqumnyń ata-anasynan jylap keshirim surady. Óziniń kinásin tolyǵymen moıyndap, zardap shekken tarapqa materıaldyq shyǵyndy tóleýge daıyn ekenin málimdedi.
24 qazanda ótken sot otyrysynda zardap shekken tarap sottalýshydan 14 mıllıon teńge mólsherinde materıaldyq shyǵyn óndirýdi talap etken edi. Alaıda keıin marqumnyń otbasy ol talap-aryzdy qaıtaryp aldy.
9 qarashada ótken jaryssóz barysynda memlekettik aıyptaýshy Álisher Baraev aıyptalýshy Malıka Muhıtovany eki jylǵa bas bostandyǵynan aıyrýdy jáne úsh jyl kólik júrgizýge tyıym salýdy suraǵan edi.
Marqumnyń ata-anasy qazaqstandyqtarǵa úndeý jasap, sottalýshynyń shyn ókingenine senbeıtinin aıtty.
