Buryn qarýlanýǵa asa mán bere bermeıtin Japonıa qazir alańdaýly. Munyń sebebi de bar shyǵar. Óıtkeni osy aımaqta áli de qaýip bar. Sebebi, búkil álem, ásirese Japonıa Soltústik Koreıaǵa qarap alańdaıdy. Ázirge soltústiktegi kárister ıadrolyq synaq jasaýdy toqtatsa da, biraq qater azaımaı otyr. Sondyqtan da bolar, Japonıa aldaǵy ýaqytta áskerı maqsatqa, ásirese eldi qarýlandyrýǵa qomaqty qarjy bóletinin jarıa etti.

Keshe japon úkimeti Lockheed Martin F-35 Lightning II tıpindegi 105 ıstrebıteldi satyp alatynyn málimdedi. Oǵan el qazynasynan da qarjy bólinip qoıdy. Olardyń ishinde  42  F-35B ıstrebıtelderi bar. Bul ǵana emes, aldaǵy bes jylda Japonıa F-35  modelindegi 45 áskerı ushaq satyp alatynyn málim etti. Bul japon áýe qarýly kúshteriniń qýatyn kúrt arttyrady. Sondaı-aq japondyqtar pılotsyz basqarylatyn apparattardyń sanyn da   arttyrýdy josparlap otyr. Bul ǵana emes, áskerı teńiz aılaǵynyń qýatyn kúsheıtpek bolyp otyrǵan japondyqtar teńizde de patrúldik ushaqtardy kóbeıtpek. Tez jáne jyldam ushatyn áskerı ıstrebıtelder qonatyn jáne birden áýege kóteriletin ushaqtardy qondyratyn Izumo kemesin satyp alý da aldaǵy besjyldyqtyń enshisinde. Eldiń kıberqaýipsizdigin nyǵaıtý men ǵarysh salasynda japondyqtardyń úlesin arttyrý da basty josparda tur. Oǵan da tıisti qarjy bólindi.

Demek, budan shyǵatyn qorytyndy ne? Qaýipsizdik – basty nazarda. Beıbit el retinde kórinetin japondyqtardyń jantalasa qarýlanýy túsinýge turarlyq. Óıtkeni Soltústik Koreıadan atylǵan talaı oqtumsyq japon teńizine baryp qulaǵan. Donald Tramp pen Kım Chen Yn osydan tórt-bes aı buryn jolyǵyp, kúrdelengen jaǵdaıdy jeńildetýge tyrysqanymen, másele  túbegeıli sheshildi deýge áli erte. Japondardyń da jantalasa qarýlanýǵa umtylyp otyrǵan sebebi osy. Óıtkeni olar Koreıa jarty túbegine qarap alańdaıdy...