"Dımashta bir tylsym kúsh bar..." Bul sózdi tanymal reseılik kompozıtor Igor Krýtoı Kremldegi konsertten keıin aıtqan. Igor Krýtoı aıtqan tylsym kúsh sol, Dımash óz jankúıerlerimen kosmos arqyly tildese alady. Dımashtyń daýysyna álemdegi mıllıondaǵan, tipti mıllıardtaǵan adamdardyń ǵashyq bolýynyń sebebi de osy tylsym kúshpen baılanysty shyǵar kim bilsin?! Londondaǵy konserttiń vıdeosy jarıalannan keıingi pikirler bul sózdiń túp-tórkinin túgel túsindirdi. Atalmysh konsertke jankúıerlerdiń keıbiri 12 saǵat erte kelgen. Olardyń bar oıy Dımashty jaqynnan kórý boldy. Dımashtyń ónerine tabynǵan sheteldik jankúıerlerdiń qyzyqty ári tańǵalarlyq oqıǵalaryn Qamshy.kz aqparat agenttigi oqyrman nazaryna usynady.
"Óler aldynda Dımashty kórsem, armanym joq"
Dımashtyń konsertine egdeleý eki qart keldi. Áıeldiń jasy - 69-da bolsa, qarıa - 75 jasta. Olardyń densaýlyǵy asa máz emes ekeni baıqaldy. Biraq olar Dımash úshin Italıadan at aryltyp kelgen. Olar «Dımashty óz kózimizben kórip, daýysyn óz qulaǵymyzben estip, ómirden ótsek», dep armandaıdy. Ekeýi de aýyr dertke shaldyqqan. Alaıda óler aldynda Dımashty bir kórý úshin konsertke kelgen. Jasy kelgen áıel kele jatyp metroda qulap qaldy. Oǵan jańa aıaq kıim alyp berdi, áıtpese, ol konsertti kóre almas edi. Olar Londondaǵy konsert bastalmas buryn saǵat 14:30-dan bastap kezekke turdy. Londondaǵy konsert keremet boldy! Alaıda álgi áıel ushaqpen keri qaıtyp bara jatqanda esinen tanyp qaldy. Jedel járdem kelgen soń áıel esin jıdy. Keıin áıeldiń fızıkalyq jáne emosıanaldyq turǵydan qatty sharshaǵany anyqtaldy. Bul týraly Youtube jelisinde «Samal Mir» atty qoldanýshy jazǵan.
"Dımash meni ólimnen arashalap qaldy"
«Meniń qasymda jas lıtvalyq áıel turdy. Tym juqa keıingendikten qatty tońyp qalǵany baıqaldy. Men ony jylyttym. Keıin ol óziniń basynan ótken erekshe oqıǵasyn aıtyp berdi. Lıtvalyq áıel biraz ýaqyt buryn súıikti adamynan aırylǵan. Orny tolmas qaıǵyny eńsere almaı, ol súıiktisiniń artynan ketkisi kelip, sýısıd jasamaq bolady. Alaıda Dımashtyń arqasynda, onyń keremet daýsynyń arqasynda ólimnen aman qalǵan. Dımashtyń ánderi lıtvalyq áıeldiń jan jarasyna em boldy. Ol jigitiniń ólimin sanaly túrde qabyldady, ary qaraı ómir súrýge degen qushtarlyǵy artty. Dımashtyń daýsy bir adamdy ólimnen arashalap qalatyndaı qudyretti! Iá, onyń daýsynda erekshe tylsym kúsh bar. Onyń ánderi, onyń daýsy adamnyń jan jarasyn emdeı alady», - dep jazdy Ibrogimova atty Youtube jelisin qoldanýshy.
"Dımash meniń ómirimdi túbegeıli ózgertti"
Dımashtyń Fransıadaǵy jankúıeri Rozı óziniń qolyna Dımashtyń qurmetine arnaıy tatýırovka saldyrǵan. 35 jastaǵy Rozı jeke klınıkada hatshy bolyp qyzmet jasaıdy. Eń alǵash ret Dımashty Parıjdegi gala-konsertte kórgen.
«Bul 2017 jyldyń 7 qazany bolatyn. Men bul kúndi eshqashan umytpaımyn. Onyń daýsyn estigen sátte óz qulaǵyma ózim senbedim. Onyń ánin estigen kezde ózimdi aspan áleminde qalyqtap júrgendeı sezindim. Keıin 2018 jyly Dımashtyń esimin kırıllısa túrinde qolyma jazdyrdym. Sebebi, jigitim -qyzǵanshaq. Ol meniń qolymda ne dep jazylyp turǵanyn túsinbeıdi. Araǵa biraz ýaqyt salyp men Dımashpen kezdesý úshin Kann festıvaline bardym. Sol kezde jańa jaqsy bir ıdeıa keldi»,- deıdi Rozı.
Keıin Qazaqstan týynyń negizgi nyshandary, Dımashtyń avtografy men «Janym sol» degen sózdi jazdyrǵan. Rozıǵa «Janym sol» degen sózdiń maǵynasy unaǵan eken.
«Meniń Dımashqa degen sezimimdi aıtyp jetkize almaımyn. Ony sondaı qatty jaqsy kóremin. Sebebi ol ómirimdi túbegeıli ózgertti. Ol meniń janymdy aman saqtap qaldy dep únemi aıtamyn. Sebebi, Dımashty bilmeı turǵan kezimde ómirimniń eshqandaı mán-maǵynasy bolmady. Mende eshqandaı maqsat ta, arman da bolmady. Qazir meniń dostarym da kóp. Ómirim maǵynaly bola bastady. Dımash jáne onyń jankúıerleri meniń ómirimniń bir bólshegine aınady», deıdi Rozı.
Dımashtyń talantyntyna eshkim shek keltirmesi anyq. Ol talantty, daryndy ǵana emes mıllıardtaǵan adamdardyń arasynda daralanyp turatyn erekshe adam. Bul baq qazaqqa buıyrdy. Baǵalaı alsaq, tek qadirleı alsaq bolǵany.
