Áleýmettik jelide Arýjan Saınnyń qaıyrymdylyq qory daý astynda qaldy. Munyń sebebi – onyń qorynda qyzmet atqaratyn adam 1986 jylǵy jeltoqsan oqıǵasyna belsene qatysty. Alaıda qazaq jastarymen birge bolǵan joq, kerisinshe olardy janshyp, sabaǵandardyń qatarynda boldy. Osyǵan baılanysty kásipker Marat Tolybaı Facebooktegi paraqshasynda pikir bildiripti. Kásipkerdiń orys tilinde jazylǵan pikirin qazaqshaǵa aýdaryp berýdi jón kórdik.
"Arýjan Saınnyń qol astyndaǵy qyzmetkeri jaıly bilgen qazaqstandyqtar óre túregeldi, Saınnan ondaı qyzmetkerdi jumystan shyǵarýyn talap etti. Alaıda Arýjan bulaı isteýge qarsy, sebebi álgi adam qor úshin ári elimizdegi qamqorsyz balalar úshin kóp jaqsylyq jasaǵan.
Buǵan shamdanǵan áleýmettik jeli belsendileri Arýjan Saınnyń qoryna qarsy kúresýge kóshti. Al keıbir tanymal blogerler Arýjan Saındy synaýshylardyń ózderin synap tastady. Aıtýlarynsha, olar – tek áleýmettik jelide batyr, shynynda, Arýjan Saın jasaǵan jaqsylyqtyń birin de jasaı almaıdy. Ony synaýǵa bolmaıdy-mys.
Eger qatelesken tusym bolsa, túzep jiberińizder, marhabat!
Meniń kózqarasym mynadaı:
Arýjan Saın – rasynda, búgingi zamannyń beldi tulǵasy. Elimizdiń kishkentaı azamattary men azamatshalary úshin qolynan kelgeniniń bárin jasady, solardyń quqy úshin kúresti. Sol sebepti de ol eli úshin «Tereza Ana» atanǵan adam.
Biraq, eren eńbegi úshin adamnyń qateligin keshire salý kerek degen qaǵıdaǵa óz basym qarsymyn. Elestetip kórińizshi, kompanıanyń bir qyzmetkeri jumysqa kúnde keshigip keledi, jınalystarǵa qatyspaıdy, mezi bolǵan bastyǵy eshteńe deı almaıdy, sebebi álgi qyzmetker kompanıa úshin mol eńbek sińirgen. Ne bolmasa, "zań barshaǵa ortaq" dep Konstıtýsıaǵa qol qoıady, tek bir adam úshin ol Zań júrmeıdi, sebebi, ol memleket úshin ter tókken. Mundaı jaǵdaılardyń bolýy múmkin be?
Menińshe, eshqandaı qurmet, eńbek adam balasyn tártipten taıdyrmaýy tıis. Kerisinshe, ol adam qoǵamǵa úlgi. Máselen, Otany úshin adal qyzmet etken Mahatma Gandı aýyz toltyryp aıtýǵa turarlyq tulǵa, alaıda óle - ólgenshe ózi jasap alǵan prınsıpterden bas tartqan joq.
Munda da solaı. Arýjannyń eńbegi eren, "biraq bul ony synaýǵa bolmaıdy" degen sóz emes qoı.
Sondyqtan, men dál qazir Arýjandy synamaqpyn. Onyń áreketi múldem durys emes. Táýelsizdik úshin kúresken jastardy toqtatqysy kelip, qysym kórsetkenin maqtan tutqan adammen birge qyzmet etý bylaı tursyn, qony rǵaýdyń ózi ábestik. Ondaı qyzmetkerden boıdy barynsha aýlaq ustaý kerek. "Áıtpegende, Arýjannyń da kózqarasy qyzmetkeriniń kózqarasymen birdeı" degen oılar týyndaıdy.
Buǵan qosa, Arýjan Saınnyń qoryna qarsy shyǵýdy qoldamaımyn. Balalarǵa kómek qashan da qajet.
Qoryta kele, mynany aıtqym keledi.
Qordyń «qurmetti» qyzmetkeri 1986 jylǵy áreketine ókinip, halyqtan keshirim surasa ıgi. Eger mıtıńige shyqqan stýdentterdi kúrekpen sabaǵany úshin óz-ózin ári qaraı maqtan tutsa, halyqtyń qarǵysyna qalmaı, eń bolmaǵanda, Arýjan Saınnyń qorynan óz erkimen ketsin. 1986 jyly boıynda bolmaǵan meıirimdilik pen jigerdi búgin tanytsa, keremet bolar edi".
Marat Tolybaev, kásipker
Facebook-tegi paraqshasynan alyndy
