Hromtaý aýdanynyń aýyldaryna gaz jetkizilip, balabaqsha men dárigerlik ambýlatorıa ashyldy, al jaǵdaıy tómen turǵyndarǵa jerlesteri qaıyrymdylyq kómekterin kórsetti.
Gazben qamtý — 93 paıyz
Oblys ákimi Berdibek Saparbaev Hromtaý aýdanyna jumys sapary barysynda Aqjar selolyq okrýginde bolyp, turǵyndardy kógildir otyn ıgiligin kórý qýanyshtarymen quttyqtady, sondaı-aq Dóń aýylyndaǵy jańa dárigerlik ambýlatorıa men balabaqshany kórdi, Ońǵar selosynda sharýa qojalyǵynyń jumysymen tanysyp, asyltuqymdy mal sharýashylyǵy kórmesinde boldy, sonymen birge muqtaj aýyl turǵyndaryna aqsha sertıfıkattaryn tapsyrdy. Oblys basshysy Aqjar selolyq okrýginde bolǵan sátinde gaz jelisiniń qosylý saltanatyna qatysty. Selolyq okrýgke qarasty Jazyq stansıasynda júrgizilgen quny 105 mıllıon teńge turatyn aýylishilik gaz jelisiniń qurylysy bıylǵy jyly maýsym aıynda bastalǵan bolatyn. Onyń jalpy uzyndyǵy 13,5 shaqyrymdy quraıdy.
— Okrýg quramyna kiretin Jazyq stansıasynda 290 adam turady. Aýylǵa kógildir otynnyń jetkizilýi turǵyndar úshin óte mańyzdy — jylý berý máselesin sheshti, — dedi Aqjar selolyq okrýginiń ákimi Qaırat Táshenov. — Osy eldi mekendegi jetpisten astam úı gazben qamtamasyz etiletin bolady. Buǵan deıin kómir, aǵash alýǵa ár otbasy jylyna 100 myń teńge shamasynda qarjy jumsaıtyn. Gaz júrgizgeni úshin ár otbasy 150 myń teńge tóleıdi, sodan keıin aı saıyn tutynylǵan gaz úshin eseptesetin bolady. Árıne, bul burynǵydaı kómirge jumsap kelgen qarjynyń qasynda salystyrýǵa da kelmeıdi.
— Memlekettiń birinshi kezektegi mindeti — eldi mekenderdi sýmen, jaryqpen, gazben, balabaqshamen jáne mekteppen qamtamasyz etý. Bizdiń oblysymyzda bul mindetti barynsha oryndaýǵa umtylýdamyz, — dep atap kórsetti aýyl turǵyndarymen kezdesý barysynda Berdibek Saparbaev. — Hromtaý aýdany qazirgi ýaqytta gazben 93 paıyz qamtylyp otyrǵanyn aıtqym keledi. Bul — jaqsy kórsetkish. Aýdandaǵy barlyq iri eldi mekender gaz jelisine qosyldy, endi qalǵan aýyldardy gazben qamtamasyz etetin bolamyz. Aqsaqaldar aýyldastary atynan oblys ákimine kórsetken qamqorlyǵy úshin shyn júrekten alǵys aıtty. Sodan keıin oblys basshysy ardagerlerge poselkelik gaz jelisi tetigin iske qosýdy usyndy.
Barlyq ýádeler oryndaldy
Dóń selosyndaǵy jańa dárigerlik ambýlatorıada jalpy praktıkalyq deńgeıdegi eki dáriger qyzmet etedi. Jobanyń jalpy quny 92,4 mıllıon teńgeni quraıdy. Medısınalyq mekeme qajetti qural-jabdyqtarmen, dári-dármekpen qamtylǵan. Dárigerge deıingi jáne dárigerlik qabyldaý, elektrokardıografıa, ekpe jasaý, fızıoterapıa kabınetteri jumys isteıdi. Ambýlatorıada kúndizgi stasıonar bar, kólik bekitilgen. Medısınalyq mekeme kúnine 50 adamdy qabyldaı alady. Oblys basshysy kúndizgi stasıonarda qansha adam emdeletinin, aýdandaǵy ana men bala ólimi jaıyn surastyrdy.
* Bul bizdiń birinshi kezdesýimiz emes, sizderdiń bir de ótinishterińiz eskerýsiz qalmaǵanyn ózderińiz jaqsy bilesizder, — dedi aýyl turǵyndaryn jańa emdeý ornynyń paıdalanýǵa berilýimen quttyqtaǵan oblys basshysy. — Sizder seloda mektep, balabaqsha, ambýlatorıa salyp berýdi suradyńyzdar, onyń bári de oryndaldy. Endi selo turǵyndarynyń aldynda mundaı úlken problemalardyń joıylǵanyna men óte qýanyshtymyn.
Alaıda mynany eskertkim keledi: aýyldyń, aýdannyń kórkeıýi úshin jergilikti jáne oblystyq bıliktiń is-áreketi jetkiliksiz, oǵan sizder de belsene qatysýlaryńyz kerek. Eń bolmaǵanda óz aýlalaryńyzdy tártipke keltirip, úılerińizdiń mańaıyn kútip ustap, aǵashtardy kóbirek egý qajet. Emdeý pýnktterimen qamtamasyz etý jaıyna kelsek, biz oblysta 26 ambýlatorıa ǵımaratyn salýdy josparladyq, qazirgi ýaqytta sonyń 18-i qolǵa alyndy. Hromtaý aýdanynda josparlanǵan jeti ambýlatorıanyń altaýy qazirdiń ózinde paıdalanýǵa berildi. Dóń selosyndaǵy jańadan paıdalanýǵa berilgen «Tóre» balabaqshasy eski mektep bazasynda qurylymdaldy. Onyń jalpy aýmaǵy 1945 sharshy metr quraıdy. Ǵımaratty tolyq qaıta qurylymdaýǵa 70 mıllıon teńge jumsaldy. Mektepke deıingi bilim mekemesin jaraqtandyrýǵa senimdi basqarýshy tarapynan taǵy 10 mıllıon teńge bólindi. Mundaǵy tórt topta 125 búldirshin tárbıelenedi. Berdibek Saparbaev bólmelerdiń jabdyqtalýyn qarap, jıhazdar sapasyna nazar aýdardy.
— Sizder Memleket basshysynyń 2020 jylǵa deıin búldirshinderdi balabaqshamen tolyq qamtamasyz etý týraly tapsyrmasy baryn bilesizder, bizdiń oblysymyzda bul tapsyrma oryndalýda. Bul turǵydaǵy kórsetkish 97 paıyzdy quraıdy, — dep atap kórsetti oblys basshysy.
Ol aýyl turǵyndarynyń nazaryn jas býyndy tárbıeleýdiń mańyzdylyǵyna aýdardy.
— Biz balalarymyzdy tárbıeleýge erekshe kóńil bólip, onymen tyńǵylyqty shuǵyldanýymyz kerek, — dep atap kórsetti Berdibek Saparbaev. — Bul rette basty jaýapkershilik ata-analarǵa túsetinin umytpańyzdar.
Mal ósirý mańyzdy
Oblys basshysy Dóń selolyq okrýgine qarasty Ońǵar selosynda ornalasqan «Danıar» sharýa qojalyǵy jumysymen tanysty. Onyń basshysy Serik Orazymbetov bul sharýany bıyl qolǵa aldy. «Sybaǵa» memlekettik baǵdarlamasyn paıdalana otyryp, 31,4 mıllıon teńgege edilbaı tuqymdas 1000 qoı satyp aldy. Munda alty adam jumys isteıdi.
— Budan basqa biz eki traktor, eki shóp býatyn tehnıka satyp aldyq, — deıdi Serik Orazymbetov. — Bolashaqta sharýany júrgizýge 190 mıllıon teńge salmaqshymyz.
— Bul óte jaqsy bastama, — dep maqtaý bildirdi oǵan oblys ákimi. — Aýyl sharýashylyǵyn jan-jaqty damytý kerek. Munaı, ken, basqa da tabıǵat baılyqtary taýsylýy múmkin, al bizdiń basty baılyǵymyz — mal burynǵy kúıinshe qala beredi, bizdiń ıgiligimizdiń ózi osynda.
Osynda, «Danıar» sharýa qojalyǵy aýmaǵynda aýdan mal ósirýshileri ártúrli sharýashylyqtardan asyltuqymdy maldar kórmesin uıymdastyrdy.
— Mal basyn ulǵaıtý óte mańyzdy, — dep atap kórsetti Berdibek Saparbaev kórmege ákelingen mal tuqymdarymen tanysqannan keıin. — Biz bul salany múmkindiginshe ıntensıvti túrde damytýymyz kerek.
Bilim men sport — egiz
Hromtaý qalasyndaǵy «Gornák» stadıonynda Berdibek Saparbaev sport nysanynyń jańa qurylymdalýy nátıjelerimen tanysty. Munda Dóń taý-ken kombınatynyń kúshimen jattyǵý zaldary bar jańa eki qabatty sport kesheni iske qosyldy. Stadıon trıbýnalarynda jańa otyrǵyshtar qoıyldy, júgirý joldary salynyp, stadıon alańy jasyl jasandy jabyndymen qymtaldy.
Jańa sport qurylysynyń jaraqtandyrylýymen tanysqan oblys ákimi endi fýtboldan aýdandyq komandanyń sporttyq tabystary jaqsara túsetindigine senim bildirdi.
— Jalpy sportqa aıryqsha nazar aýdaryp, balalardy dene shynyqtyrý sabaqtaryna kóbirek tartý kerek, — dedi oblys basshysy.
Berdibek Saparbaev sondaı-aq Hromtaý qalasyndaǵy №3 mektepte boldy. Munda Dóń taý-ken kombınatynyń jáne aýdan ákimdiginiń qarjylaı qoldaýymen qurylymdalǵan STEM-laboratorıalar aıasynda
jumys isteıtin İT-klastar, robototehnıka jáne bıznes kabınetteri paıda boldy.
— Bul jańa kabınetterdiń iske qosylýy biz úshin qýanyshty. Óıtkeni ol balalardyń ıntellektýaldy damýy úshin qýatty serpin beredi, — deıdi mektep dırektory Omar Ótegenov.
1200 orynǵa arnalǵan mektepte qazir 986 bala oqyp, 80 ustaz dáris beredi. Oblys ákimi oqýshylarmen sóılesip, kompúter klasynda boldy. Bıznes-kabınette shákirtter óz ıdeıalarymen bólisti. Olardyń kóbisi qazirdiń ózinde naqty tabys ákelýde. Mysaly, on birinshi synyp oqýshysy Damır Alborıev uıymdar men jeke úılerge komýnaldyq qyzmetter úshin túbirtekter taratady.
— Men ár túbirtek úshin 10 teńge tólem alamyn, — deıdi jas bıznesmen. — Bul — men úshin eleýli tabys kózi.
Osy mektepte «Júrek jylýy» atty qaıyrymdylyq aksıasy uıymdastyryldy. Aýdan kásipkerleri tabysy tómen otbasylaryna materıaldyq kómek kórsetti, sondaı-aq az qamtylǵan otbasylarynyń joǵary oqý oryndarynda oqıtyn balalarynyń tólemaqylary jabyldy.
— Bul — óte mańyzdy shara, bizdiń halqymyz qaı ýaqytta da óziniń jaqyndaryna ǵana emes, sondaı-aq qýǵyn-súrginmen jáne taǵdyr tálkegimen bizdiń ólkemizge kelgenderdiń bárine de kómek jasaǵan, — dedi Berdibek Saparbaev. — Toptasqandyq pen ózara kómek, bir-birimizdi qoldaý arqyly ǵana bizdiń memleketimiz ben birtutas halqymyz ilgeri qadam basyp, damı alady. Sodan keıin oblys ákimi, ardagerler, Hromtaý aýdanynyń ákimi Amanǵalı Berdalın qaıyrymdylyq aksıasyna shaqyrylǵan selo turǵyndaryna aqshalaı sertıfıkattar tapsyrdy.
