Qaraǵandydaǵy kisi ólimine qatysty 8 kúdikti tutqyndaldy. Bul týraly QR İİM İshki jáne syrtqy komýnıkasıalar departamentiniń dırektory Almas Sadýbaev málimdedi, dep habarlaıdy Qamshy.kz aqparat agenttigi.

Quqyq qorǵaý organdarynyń málimetine súıensek, búgingi kúni "Qaraǵandyda buzaqylyq áreket jasap, 23 jastaǵy jigitti óltirdi" degen kúdikpen 8 adam ustalyp tutqyndaldy jáne kúdiktilerdiń biri Gýrýránǵa izdeý jarıalandy.

"Tergeý aıasynda polısıa toby onyń bolýy múmkin aýmaǵyna attandy. Kúdiktiniń óz erkimen berilýge daıyn ekendigi týraly málimdemesi áleýmettik jelilerge jarıalanýyna baılanysty osydan 2 kún buryn onyń týystaryna qyzmetkerlerimizdiń baılanys derekteri berildi. Alaıda osy kúnge deıin eshkim baılanysqa shyqqan joq», - dedi Almas Sadýbaev.

Departament basshysy elimizdiń İshki ister mınıstrligi istiń obektıvti ári jan-jaqty tergeletindigine kepil beretindigin atap ótedi. 

Sonymen qatar, azamat Gýrýránǵa óz erkimen polısıa qyzmetkerine berilýge keńes beredi.

Sadýbaevtyń aıtýynsha, tergeý barysy Qazaqstan Respýblıkasy İshki ister mınıstrliginiń aıryqsha baqylaýyna alynǵan.

Eske salsaq, 1 qańtar kúni Qaraǵandydaǵy «Drevnıı Rım» meıramhanasynda bolǵan janjal kezinde bir jigit kóz jumdy. Bılik atalǵan prosestiń obektıvti jáne barynsha ashyq ótetinin aıtqan.

6 qańtarda Qaraǵandy oblysynyń ákimi Erlan Qoshanov tóbeles saldarynan qaza tapqan jigittiń týystarymen kezdesip, kinálini jazalaýǵa sóz berdi.

Dúısenbi, 7 qańtarda Armenıanyń Syrtqy ister mınıstriniń resmı saıty SİM basshysynyń orynbasary Shavarsh Kocharánnyń pikirin jarıalady.