Ankarada Reseıdiń Túrkıadaǵy elshisi Andreı Karlovtyń isine qatysty sot isi bastaldy. Bul jaıynda Qamshy.kz aqparat agenttigi BBC saıtyna silteme jasap habarlaıdy.

Reseıdiń Túrkıadaǵy elshisi Andreı Karlov 2016 jyldyń jeltoqsanynda oqqa ushyp qaza tapqan bolatyn. Tergeý isiniń qorytyndysy boıynsha, bul istegi 28 aıyptalýshynyń elde tyıym salynǵan FETO uıymyna qatysy bolǵan eken. Túrik bıligi "terorıstik" dep tanylǵan uıymnyń jetekshisi Fethýlla Gúlen AQSH-ta turady.

♦Elshini atqandy qaı atańnan kórdiń, túrik balasy!?

Aıta keteıik, 2016 jyldyń 19 jeltoqsanynda Ankarada Qazirgi zaman óner ortalyǵynda fotokórmeniń ashylý saltanatynda Reseı elshisi  atyp óltirilgen bolatyn. 22 jastaǵy Mevlút Mert Altynshash elshige birneshe ret oq atyp, «Allahý akbar! Aleppony umytpańdar!» dep aıqaı salǵan.

Sol kúni qaýipsizdik kúshteri elshige oq atqan Altynshashty da atyp óltirgen bolatyn.

Belgili bolǵandaı, FETO uıymynyń ókilderi Altynshashqa sol jyldyń jazynda elshini óltirýge buıryq bergen. Túrik prokýratýrasynyń málimdemesine sáıkes, Altynshash Andreı Karlovty 2016 jyldyń 27 maýsymynda Túrkıadaǵy bılik partıasy uıymdastyrǵan elshilerdiń keshki asynda óltirýge talpynǵan kórinedi.