Qaraǵandyda adam ólimimen aıaqtalǵan jappaı tóbelesten keıin izin jasyrǵan kúdikti Narek Gýrýrán Reseı aýmaǵyna qashqan. Bul týraly búgin ishki ister mınıstriniń birinshi orynbasary Janat Súleımenov málimdedi, dep habarlaıdy Qamshy.kz aqparat agenttigi Sputnik Qazaqstan málimetine súıene otyryp. 

Súleımenovtiń aıtýynsha, jedel tergeý sharalary barysynda kúdiktiniń Pavlodar oblysyndaǵy beket arqyly Reseı aýmaǵyna ótkeni belgili boldy.  

"Kúdikti 1 qańtar kúni keshki 22.00-den keıin shekarany kesip ótken", — dedi mınıstrdiń birinshi orynbasary OKQ-de ótken brıfıńte. 

Ony izdeý úshin eki jedel tergeý toby Reseıge, al taǵy bir top Armenıaǵa jiberilgen. 

"Biz qazir áriptestermen birge ózara is-qımyldy pysyqtap jatyrmyz. Kúdiktiniń beıneúndeýi ony ustaýǵa jáne zańdy túrde qylmystyq jaýapqa tartý úshin Qazaqstanǵa qaıtarýǵa septigin tıgizedi degen oıdamyn. Al kúdiktiniń qylmysty jasaǵan-jasamaǵanyna qatysty, meniń oıymsha, tergeý organdarynda dál sol sátte negiz jetkilikti boldy. Sot sanksıa berdi", — dedi Súleımenov.