AQSH-ta jaǵdaı qıyn bolaıyn dep tur. Basty másele­­ - Meksıkamen aradaǵy qabyrǵa. Biraq demokrattar bul qabyrǵanyń turǵyzylýyna qarsy. Qazir AQSH-tyń Aýyl sharýashylyǵy, Ádilet mınıstrligi, tipti memlekettik departamenttiń ózi 22 jeltoqsannan beri jumysyn toqtatty. Óıtkeni qazynadan aqsha bólingen joq. Qazir kongres Meksıkamen arada qabyrǵa salýǵa qarsylyǵyn bildirip jatyr. Al Tramp aıtqanynan qaıtatyn emes. Tipti saılaýaldy kampanıasynda Donald Tramp «Meksıka shekarasynda qabyrǵa salýǵa ýáde etken». Mine, sol aıtqanyn oryndatýǵa kúsh salýda. Biraq oǵan qarsy kúshter áli de jetkilikti. Ásirese, demokrattar narazylyǵyn bildirýde. Alaıda, keshe AQSH prezıdenti Donald Tramp amerıkalyqtarǵa teleúndeý jasady.

­-Eldiń qaýipsizdigin saqtaý úshin Meksıka qabyrǵasyn turǵyzý kerek. Onsyz bolmaıdy. Elde qylmys kóbeıdi. Munyń barlyǵyn Meksıka arqyly keletin mıgranttar jasap otyr. Sondyqtan qandaı jaǵdaıǵa qaramastan demokrattar bul jaǵdaıdy túsinýi kerek. Biz shekaramyzdy osylaı qorǵaýymyz kerek, -dedi ol halyqqa arnaǵan úndeýinde.

El qaýipsizdigi úshin Tramp demokrattarǵa jeńildik jasaýǵa daıyn ekenin aıtty. Sonda prezıdenttiń aıtyp otyrǵany ne? Ras, Tramp buryn qabyrǵany betonnan turǵyzýǵa ýáde bergen. Endi ony arzanyraq bolýy úshin metaldan jasamaqshy. Bul endi bir-eki kúnde sheshilip qalýy múmkin.   

Donald Tramptyń oıynsha, «Meksıka qabyrǵasy» ózin-ózi aqtaıdy. Prezıdenttiń oıynsha, sodan keıin baryp Meksıkamen saýda kelisimin tıimdi baǵytta júrgizýge bolady. Árıne, Donald Tramptyń jobasy dál qazir AQSH búdjetine aýyr salmaq túsirýi múmkin. Biraq keıin ózi aıtqandaı,  munyń paıdasy zor bolady. Aqıqaty, óz-ózin aqtaıdy. Óıtkeni...

Búgingi tańda Meksıka arqyly AQSH-qa zańsyz keletin esirtkilerdiń quny shamamen jylyna 500 mıllıard dollardy qurap otyr. Sondyqtan da prezıdent kongresten qabyrǵa úshin 5,7 mıllıard dollar surap otyr. Al depýtattar bar-joǵy 1,3 mıllıard dollar berýdi ǵana maquldaǵan syqyldy.

-Qabyrǵany turǵyzǵannan keıin biz ketken shyǵynnyń barlyǵyn Meksıkamen aradaǵy tıimdi saýda kelisimsharty arqyly aqtap alamyz, - deıdi Aq úı qojaıyny.

Eger bul jobaǵa demokrattar kónbese, onda el búdjetine qol qoıýdan bas tartatynyn málim etti Donald Tramp.

Qalaı aıtqanda da, Donald Tramp bıznestegi adam ǵoı. Munyń bárin aldyn-ala kesip, piship otyrǵan bolar. Osydan biraz ýaqyt buryn G20 samıti aıasynda AQSH, Kanada jáne Meksıka arasynda USMCA saýda kelisimine qol qoıylǵany belgili. Tramp osyny meńzep otyrǵan bolar...