Ótken jyldyń 29 jeltoqsanynda bolǵan jol apatynyń máselesi áli sheshiler emes. Úsh adamnyń ómirin jalmaǵan apatqa kináli azamatqa qatysty tergeý isine qaza tapqan jandardyń týystarynyń kóńilderi tolmaıdy. Redaksıamyzǵa habarlasqan marqum Hamıtovanyń inisi Azamat Hamıtov 10 kúnnen asa ýaqyt ótse de, áli kúnge deıin kúdiktiniń mas kúıinde kólik basqarǵanyn dáleldeıtin saraptama nátıjesi daıyn emestigin aıtyp, shaǵym bildirdi.

«Bul isti QR İshki ister mınıstrligi óz baqylaýyna aldy, sondyqtan bári operatıvti túrde jyldam oryndalýy tıis emes pe?! Biraq on kúnnen asa ýaqyt ótse de, áli saraptama nátıjesi daıyn emes. Ne sebepti sozbaqtap júr, túsinbeımin. Tergeýshilermen kezdesip suraǵanymyzda, «Arada demalys kúnder boldy, áli saraptama qorytyndysy ázir emes. Biz saraptamalyq ortalyqqa jiberdik, áli jaýabyn kútýdemiz», - dep jaýap berdi.

On kún – az ýaqyt emes, aldaǵy ýaqytta "Gelendvagen" júrgizýshisiniń, shyn mánisinde, mas bolǵanyn dáleldeı alamyz ba? Osy suraq bizdi mazalaıdy», - deıdi Azamat Hamıtov.

♦Úsh adamnyń ómirin jalmaǵan jol apatyna qatysty tyń derekter paıda boldy

Osy ýaqytqa deıin jergilikti BAQ betterinde jáne áleýmettik jelide taraǵan aqparatta kýágerler qylmyskerdiń mas kúıinde kólik basqarǵanyn aıtqany belgili, sonymen qatar, kýáger retinde túsinikteme de bergen. Al marqumnyń týysy "ýaqyt óte kele kýágerler ózderiniń pikirinen bas tarta ma" dep alańdaıdy.

«Tergeýshiler kýágerlerdiń bergen túsiniktemesi arqyly Ilás Ismarovıch mas boldy dep aıtyp otyr. Biraq olar da - adamdar, búgin osylaı dep túsinikteme berse, kelesi kúni bul pikirinen aınyp qalýy da ábden múmkin. Sondyqtan da onyń kináli ekendigin dáleldeıtin resmı qujattyń bolýy shart», - deıdi ol.

♦Marqum Hamıtovanyń uly: "Olar sol kúni Sholpan Elgezekovanyń úıine bet alǵan bolatyn"

Sonymen qatar, ol "Gelendvagen" kóliginde, shyn mánisinde, qansha adam otyrǵan?» degen suraqqa jaýap izdep júrgenin aıtty.

«Jol apaty bolǵan kúni "Gelendvagen" kóliginde bir ǵana adam boldy dep aıtylyp júr. Biraq áleýmettik jelide taralǵan oqıǵa ornynda túsirilgen vıdeolarda kýágerler kólikte úsh adamnyń bolǵanyn aıtady. Al tergeýshiler bolsa, «beınebaqylaý kameralarynan naqty qansha adam bolǵany kórinbeıdi» - deıdi. Sondyqtan bul is boıynsha tek bir adam ǵana jaýapqa tartylýda.

Anyǵyna kelsek, jol apaty oryn alǵan kezde qylmysker oqıǵa ornynan izin sýytyp, basqa bireýdiń kóligimen ketip qalǵany belgili. Keıin BAQ-ta taralǵan aqparatta ony 30 jeltoqsanda qolǵa túsirdi dep aıtqan edi. Al tergeýshiler óz sózinde "30-y kúni Kar Ilás Ismarovıch bólimshege ózi kelip, kinásin moıyndady" - dep aıtyp otyr. Túsinbedim, sonda olardyń maqsaty ne?», - dep aıtyp ótti Azamat Hamıtov.

Bul iske qatysty biz zańgerden keńes surap, onyń pikirin bilgen edik.

«Bul narkologıalyq saraptama kategorıasyna jatady, ol – kúrdeli kategorıa. Zań boıynsha, mundaı saraptamanyń merzimi 30 táýlikke deıin bolady. Degenmen, odan erte daıyn bolýy múmkin nemese qandaı da bir málimetter jetispegen jaǵdaıda prosesti toqtatyp qoıýy da ábden múmkin», - deıdi zańger Qaırat Júkel.

Esterińizge sala keteıik, 2018 jyldyń 29 jeltoqsanynda Almaty qalasyndaǵy Abaı jáne Seıfýllın kósheleriniń qıylysynda jantúrshigerlik jol apaty bolyp, úsh adam – aktrısa Sholpan Elgezekova, Dınara Hamıtova jáne kólik júrgizýshisi Baqytnur Qunapıauly – oqıǵa ornynda kóz jumǵany belgili, al aktrısa Aızada Satybaldıeva es-tússiz kúıde aýrýhanaǵa jetkizilgen. Mas kúıinde kólik tizginin ustaǵan dúngen azamaty qyzyl baǵdarshamǵa ótip ketip, saǵatyna 120 shaqyrym  jyldamdyqpen Mitsubishi Galant kóligin kelip soqqan. Qaza tapqan jandardyń týystary kináli azamattyń ústinen sotqa aryz berip, laıyqty jazaǵa tartylýyn talap etýde.