6 qańtar kúni «Jýsan» operasıasy barysynda Sırıadan Qazaqstanǵa oralǵan otandastarymyzdy azamattyǵynan aıyrý isine qatysty UQK departament basshysy Bahytbek Rahymberdıev pikir bildirdi, dep jazady Qamshy.kz aqparat agenttigi KazTAG saıtynyń málimetine súıene otyryp.

-«Azamattyqtan aıyrý máselesine kelsek, mundaı ereje Elbasynyń bastamasymen zańǵa engizilgen. Qazirgi ýaqytta qarýly qaqtyǵys aımaǵynda bolyp kelgen azamattar úshin mundaı shara ázirlenip jatyr. Sot sheshimi boıynsha júzege asyrylýy ábden múmkin. Alaıda, 6 qańtar kúni Qazaqstanǵa oralǵandar múlde basqa kategorıaǵa jatady. Olar óz erikterimen elge qaıtqylary keletinin aıtqan. Al terorıstik topqa qatysy bar dep aıyptalǵandar jazasyn Qazaqstanda óteıtin bolady. Al kinási joq qazaqstandyqtardy azamattyǵynan aıyrýdyń esh sebebi joq, jaqynda oralǵan azamattardyń kópshiligi kinásiz», - dep aıtyp ótti B.Rahymberdıev.

«Jýsan» operasıasy barysynda elge oralǵan qazaqstandyqtardyń jeteýi terorıstik  topqa qatysy bar dep aıyptalǵan bolatyn.

Aıta keteıik, keshe ǵana Elbasy Sırıadan oralǵan otandastar jóninde málimdeme jasady.

-«6 qańtar kúni quqyq qorǵaý organdary men QR SİM birlese otyryp «Jýsan» gýmanıtarlyq operasıasyn ótkizdi. Nátıjesinde 47 qazaqstandyq elge oraldy, onyń 30-y kishkentaı balalar. Olar belgisiz bireýlerdiń aldaýyna túsip, daǵdarys keńinen jaılaǵan elge jetkizilip, sonda terrorısterdiń qolynda kepilde bolǵan», - dep atap ótti Nursultan Nazarbaev.

Elbasy óz sózinde qazaqstandyqtardy qaı elde bolmasyn qashan da  qoldaýǵa daıyn ekendigin jetkizdi.