Júzden astam ana quqyq qorǵaý organdarynan Sırıada júrgen balalaryn elge qaıtarýdy ótinip, kómek surady dep jazady Qamshy.kz aqparat agenttigi Sputnik Qazaqstan saıtynyń deregin negizge alyp.
Qaraǵandy oblysy Sátpaev qalasynyń turǵyny Sırıada júrgen kelini men úsh nemeresin kútip júrgenin aıtty. Botagóz Mahatova Sırıaǵa ketken ulynan eki jyl buryn aıyrylǵan. Biraq balasynyń artynda kelini men úsh nemeresi qalypty, aıtýynsha, olar qaqtyǵys aımaǵynan shyǵa almaı jatyr.
"Meniń kelinim áli sonda, sol óńirden shyǵa almaı jatyr. Qaıda qasharyn da bilmeıdi, óıtkeni onda barlyq jerge mına qoıylǵan", — dedi áıel Qazaqstannyń Syrtqy ister mınıstrliginde ótken brıfıńte.
Botagóz sıaqty analar Qazaqstanda az emes. Áıelder messendjer arqyly sóılesip, Sırıadaǵy soǵysqa attanǵan jaqyndarymen baılanysqa shyǵyp turady. Mahatova otyratyn chatta 120 ana bar. Olardyń tek ony ǵana balalarymen qaýyshqan.
Áıeldiń aıtýynsha, uly dindi jete túsinbegendikten Sırıaǵa ketken, al onyń jary men balalary – otaǵasy jasaǵan qateliktiń qurbany.
2012 jyly soǵysqa attanǵan er adam ata-anasyna Mysyrǵa oqýǵa bara jatqanyn aıtqan. Jarty jyldan keıin onyń otbasymen birge Sırıada júrgeni anyqtaldy.
Osydan keıin Botagóz Mahatova birneshe márte quqyq qorǵaý organdaryna júginedi. Alaıda onyń otbasyna kómektesý ázirge múmkin bolmady.
Ulynyń qalaı kóz jumǵany da belgisiz, tek er adamdy jerlep jatqany túsirilgen beınerolık qana bar.
"Olardyń óz otanyna oralýyna eshkim qarsylyq bildirmeıdi degen úmittemin, óıtkeni olardyń barlyǵy – Qazaqstan azamaty. Olar ómirde adasyp, burys jolǵa túskenin túsindi", — deıdi nemerelerin saǵynyp júrgen áıel.
Keshe Qazaqstan prezıdenti Nursultan Nazarbaev Sırıada terrorısterdiń qolynda kepilde bolǵan 47 qazaqstandyqtyń elge qaıtarylǵany týraly málimdeme jasady.
"Jýsan" operasıasy kezinde 6 er adam, 11 áıel jáne 30 bala elge qaıtaryldy. Olardyń barlyǵy Qazaqstanǵa óz erkimen kelgen. Onyń ishinde 6 er adam men 1 áıel terorıstik qyzmetke qatysty degen kúdikke ilindi.
Aldyn ala málimet boıynsha, qazir Sırıada 800-ge tarta qazaqstandyq júr.
