"Caravan.kz-tiń" korespondenti Nıkıta Danılın Qaraǵandy İİM akademıasynyń sý jańa basshysy Aqynqalı Dármenovtiń jasyrary bar ma degen suraq qoıyp, materıal jazypty. Pýshkınniń tilinde jazylǵan Dármenov týraly syrdy memlekettik tilimizge aýdaryp, qalyń oqyrman nazaryna usynamyz.
Qaraǵandydaǵy polıseılerdiń jańa jyldyń qarsańyndaǵy ózderin «bratvamyz» dep jar salyp, eldi shýlatqanynan keıin akademıanyń basshylyǵy birden aýysty. Vıdeonyń bas keıipkeri, Qaraǵandy akademıasynyń birinshi kýrs basshysynyń orynbasary Tastaıbekovtyń ornyna Aqynqalı Dármenov keldi. Qyryqtyń qyrqasyna kelgen polkovnık týraly aqparat az.
Qaraǵandy akademıasynyń tóńiregindegi shý basyldy. Óz logıkalyq sheshimin tapty desek bolady. Qyzmetten qýylǵan Tastaıbekov endigári quqyq qorǵaý organynyń mańaıyna da jolaı almaıdy.
♦Qaraǵandy İİM akademıasynyń basshysy jumystan qýyldy
Sonymen qatar atalmysh akademıanyń bastyǵy Jan Kenjetaev ta óz erkimen jumystan ketipti. Sebebi qartaıyp qalypty.
Onyń ornyna kelgen Aqynqalı Dármenov úzdik eýropalyq mekemelerde bilim alǵan, qyzmet jolyn qarapaıym tergeýshiden bastaǵan polısıa polkovnıgi.
Búginde Dármenovke úmit artyp otyrǵandar az emes. Alaıda Aqynqalı sútten aq, sýdan taza ma?
5 215 teńge 86 tıyn degen kóp aqsha emes. Degenmen qaryzdyń aty qaryz.
QR Joǵarǵy sotynyń sot aktileriniń bazasyn teksersek, Dármenovtiń atyna sotqa shaǵym túsirilgenine kóz jetkize alamyz.
Akademıanyń bastyǵy bolǵanǵa deıin Aqynqalı Dármenov Qaraǵandy oblysynyń İİB oqý ortalyǵynyń basshysy bolǵandyǵy bizge málim. Bul ortalyq keıinnen Temirtaý qalasynyń İİB oqý ortalyǵyna aınalady. Sonymen qatar MKK (memlekettik kiris komıteti –red.) bazasyna zer salsaq, «Aqynqalı Dáýitbaıuly Dármenov» degen aty-jónmen biraq adam ǵana bar.
Sol sebepti Qaraǵandy oblysy Temirtaý qalalyq sotynda 2018 jyldyń 1 qazanynda qarastyrylǵan shaǵym bizdiń Dármenovke tikeleı qatysty dep aıtýǵa bolady.
Aryzdanýshy – «Oqjetpes-T» JSHS. Olardyń basty talaby – Dármenovtiń komýnaldyq tólemderdiń qaryzyn tolyqtaı óteýi. Demek polkovnık 2016 jyldyń 1 sáýirinen 2018 jyldyń 1 tamyzyna deıin komýnaldyq tólemge aqsha shyǵarmaǵan. Kúlki kúni dep qaljyńdaǵany ma, onysyn bilmedik. Biraq 75 714 teńgege qaryz bolyp qalǵan.
Nátıjesinde Tatána Gavrıchenkova esimdi sot Dármenovtiń qaryzdy tolyq óteýin jáne 1136 teńge kólemindegi memlekettik bajdy da tóleýin talap etedi.
Polısıa polkovnıgi Aqynqalı Dármenov zań-tártipke baǵynyp, qyzmetin adal atqaryp, shalys qadam jasamaıdy dep úmitteneıik.
Aýdarǵan: Jazıra Baıdaly
