Jambyl oblysynyń týmasy Nuraly Qıasov Denıs Tendi óltirýdi josparlamaǵanyn aıtty dep jazady Qamshy.kz aqparat agenttigi sputniknews.kz saıtynyń deregin negizge alyp. 

Denıs Tenniń ólimine kúdikti Nuraly Qıasov jasaǵany úshin óz kinásin moıyndady. 

Nuraly Qıasov sportshyny pyshaqpen jaraqattap óltirgeni úshin aıyptalyp otyr.

"Men óz kinámdi tolyqtaı moıyndaımyn. Biraq óltirýdi aldyn ala josparlaǵan joqpyz", — dedi Nuraly Qıasov.

Qıasovtan ózge aıyptalýshylar oryndyǵynda Arman Qudaıbergenov pen Janar Tolybaeva otyr. Er adam kisi óltirgeni, áıel adam qylmys týraly habar bermegeni úshin aıyptaldy. Juma kúngi sot otyrysynda Qudaıbergenov Tendi óltirýdi josparlamaǵanyn jáne ony pyshaqpen jaraqattamaǵanyn aıtqan-dy. Al Tolybaeva jigitterdiń qaladaǵy turaqtardaǵy kólikterden aına urlap júrgenin bilmegenin jetkizdi.

Proses Almatydaǵy qylmystyq is boıynsha mamandandyrylǵan sotta qazaq tilinde ótip jatyr.

Denıs Tenniń qazasy

Qazaqstandyq mánerlep syrǵanaýshy Denıs Ten 2018 jyldyń 19 shildesinde 25 jasynda kóz jumdy. Kóliginiń aınasyn urlaǵandardy toqtatpaq bolǵan sportshyny urylar san tusynan pyshaqpen jaraqattady.

Arman Qudaıbergenov, Nuraly Qıasov jáne Janar Tolybaeva kisi óltirdi degen kúdikke ilindi. Er adamdar tonap, kisi óltirgeni, al áıel qylmys týraly habarlamaǵany úshin aıyptalyp otyr.

Sotta marqum mánerlep syrǵanaýshynyń anasy Oksana Ten ulynyń tapsyryspen óltirilgenine senimdi ekenin aıtty. Sondaı-aq, sotta oqıǵa bolǵan jerge birinshi bolyp jetken eki polıseı kýáger boldy.