Premer-mınıstr sıfrlandyrý boıynsha júrgizilgen jumystardyń kemshiligin atady. Qazaqstan Respýblıkasynyń premer-mınıstri Baqytjan Saǵyntaev sıfrlandyrý boıynsha halyqqa túsindirý jumystaryn durys júrgizbeı otyrǵan mınıstrlerge shúılikti, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap. 

Baqytjan Saǵyntaev kezekti úkimet otyrysy barysynda mınıstrlerdiń jumysyna kóńili tolmaı otyrǵanyn aıtty.

"Mysaly, kólikti onlaın tirkeý nemese kólik júrgizý kýáligin alý qyzmeti bar deıdi. Basqa kórsetiletin qyzmetterdiń sany bylaı aıtqanda kóp emes. Nege? Bul tıimdi nárse. Halyq sonda qanshalyqty tıimdi ekenin bilmeı otyr ma?! Qalmuhanbet Nurmuhanbetuly (Qasymov — İshki ister mınıstri), bıyl İİM arqyly qansha kólik tirkeýden ótti?", — dep surady premer-mınıstr.

İshki ister mınıstri óz kezeginde bıyl 2,5 mıllıon kóliktiń tirkeýden ótkenin aıtty. Sondaı-aq, josparǵa sáıkes, taǵy jeti memlekettik qyzmet túriniń jyl sońyna deıin onlaın nusqasy paıda bolatynyn jetkizdi.

"Joq, onlaın tirkelgen kólik túrin aıtamyn. Slaıdta 4 639 ǵana qyzmet kórsetildi dep jazylǵan. Tipti, 2,5 mıllıon ótken bolsa da, túk te emes. Oryssha aıtqanda, "ne dorabatyvaem", — dedi Baqytjan Saǵyntaev.

Ári qaraı premer-mınıstr "Bul qyzmetti engizgenimizge eki aı ǵana boldy" dep aqtalǵan Dáýren Abaevtyń sózin bóldi. Qujat boıynsha atalǵan qyzmet túri 2018 jyldyń maýsym aıynan bastap engizilgenin aıtty. Sondaı-aq, halyqqa túsindirý jumystaryn júrgizý jáne qoljetimdilik máselesine nazar aýdarýdy surady.

"Onlaın qyzmet túri engizilgenimen, halyq báribir de HQKO-ǵa baryp kezekke turyp jatyr. Ony barmaı-aq úıinde uıaly qosymsha arqyly ala berýine bolatyn edi. Onyń ústine qajettisin poshta arqyly da ákelip beredi. (…) Adammen júzbe-júz kórisken kezde barlyǵynyń túsinikti bolatyny sózsiz. Biraq, halyq ınternetke kirip eshnárse túsinbeı otyr. Kólik nemese avtobýsqa minip, qyzmet kórsetý ortalyǵyna barady. Aqparatty túsindirý jumystary nashar", — dep synady Saǵyntaev.

Budan ózge premer-mınıstr 2019 jyly jańa formatqa aýystyrylýy tıis memlekettik qyzmetterdiń tizbesin jasaýdy tapsyrdy. Ortalyq jáne memlekettik organdardyń barlyǵy osy tizbe jasalǵannan keıin ýaqytyly sharalar qabyldaýy tıis. Jol kartalaryn ázirleý jáne vedomstvoaralyq tıimdi ózara júıelerdi biriktirýdi qamtamasyz etý mindeti premer-mınıstrdiń orynbasary Asqar Jumaǵalıevke júkteldi.