Azat Perýashev Qazaq Respýblıkasy ataýyn qaıta engizýdi usyndy. Bul jóninde «Aq jol» partıasynyń tóraǵasy búgingi ótken Májilistiń plenarlyq otyrysynda Úkimet basshysynyń atyna depýtattyq saýal joldady, dep habarlaıdy Qamshy.kz aqparat agenttigi.
Onda «1920 jyly tamyz aıynda Moskvada SovNarKom shekara máselesin jan alysyp talqylaǵanda, Álimhan Ermekov birneshe ret baıandama jasady. Osy jumysqa Ahmet Baıtursyn, Álıhan Bókeıhan jáne basqa da qazaq delegasıasynyń 12 múshesi tikeleı qatysty.
Sonda olar arnaıy ekspedısıalarda jınastyrǵan ǵylymı derekterge súıenip, qazaq jeriniń tutastyǵyn dáleldep shyqty. Nátıjesinde, sol jyly Avtonomdy Keńestik Respýblıka qurylyp, 1925-shi jyldan bastap oǵan halqymyzdyń tól «Qazaq» degen ataýy berildi», - delingen.
«Kelesi, 2020 jyly memlekettilik turǵysynan bolashaq Táýelsiz Qazaqstannyń irgetasyna aınalǵan, KSRO quramyndaǵy Qazaq Respýblıkasynyń, naqtylap aıtamyn – Qazaq Respýblıkasynyń – qurylǵanyna 100 jyl tolady. Qazaqstan ataýymen qatar resmı túrde qoldanylýy úshin – Qazaq Respýblıkasy ataýyn qaıta engizý múmkindigin qarastyrýdy usynamyz», - dep málimdedi Perýashev.
Esterińizge sala keteıik, mundaı bastamany 5 jyl buryn, «Máńgilik El» tujyrymdamasyn talqylaý barysynda Elbasy Nursultan Nazarbaevtyń ózi usynǵan bolatyn.
«Aq jol» fraksıasynyń jetekshisi: «Bizdiń oıymyzsha Elbasymyzdyń ustanymyn iske asyratyn kez keldi. Qarany – qara, aqty – aq, qazaqty – qazaq dep ataýymyz kerek.Tipti totalıtarlyq sovet ókimeti moıyndaǵan Qazaq atyn Respýblıkamyzǵa qaıtarý – tek tarıhı ádiletti qurmetteý ǵana emes, sonymen qatar, barsha kópultty otandastarymyzdyń birligi men yntymaǵyn odan ári nyǵaıtýǵa serpin beretinine senimdimiz», - dep atap ótti óz sózinde. Depýtattyq saýaldyń tolyq mátini tómende keltirilgen.
Qazaqstan Respýblıkasynyń
Premer-Mınıstri
B.Saǵyntaev myrzaǵa
Depýtattyq saýal
Qurmetti Baqytjan Ábdiruly!
Qazirgi Táýelsiz Qazaqstannyń tarıhı tamyry tereńde jatqany barshamyzǵa málim. Búkil adamzattyń damýyna áser etken arǵy atalarymyzdyń jańashyldyǵyn jaqynda ǵana Elbasymyz «Uly dalanyń jeti qyry» maqalasynda ashyp kórsetti.
«Máńgilik El» ıdeıasynyń arqasynda Qazaq handyǵynyń 550 jyldyǵy joǵary deńgeıde atalyp ótti.
Sonymen qatar, Elbasy Nursultan Nazarbaev «Alash» qozǵalysynyń 100 jyldyǵyna oraı, onyń ustanymdary, ata-babalarymyzdyń azattyq alyp, derbes memleket qurý jolyndaǵy san ǵasyrlyq amanatymen ushtasyp jatqandyǵyn tujyrymdady.
1917 jyly «Alash» avtonomıasyn quryp, «Alashorda» qaıratkerleri Reseı Quryltaı jınalysymen, Ýaqytsha Sibir úkimetimen jáne Ýfa dırektorıasymen qarym-qatynas ornatyp, áskerı odaqtas boldy.
Biraq, bastalǵan azamat soǵysynda «Alashtyń» áskerleri men olardyń qubylmaly reseılik seriktesteri qaptaǵan bólshevıkterdiń qatygez basqynshylyǵyna tótep bere almady.
Qazaqtyń ult qaıratkerleri qurǵan Túrkistan avtonomıasy da kúshpen taratyldy. Degenmen, olardyń barlyǵy qazaq eliniń taǵdyrynda jańa memlekettilikke umtylystyń úlgisi retinde iz qaldyrdy.
Sondaı qıyn zamanda eldi apattan aman alyp shyǵý úshin «Alashorda» jetekshileri Sovet ókimetimen kelissózge baryp, KırRevKom quramyna enip, óz halqyna qyzmet etti, eń aldymen – Qazaq jeriniń terıtorıalyq tutastyǵy úshin kúresti. 1920 jyly tamyz aıynda Moskvada SovNarKom shekara máselesin jan alysyp talqylaǵanda, Álimhan Ermekov birneshe ret baıandama jasady. Osy jumysqa Ahmet Baıtursyn, Álıhan Bókeıhan jáne basqa da qazaq delegasıasynyń 12 múshesi tikeleı qatysty.
Sonda olar arnaıy ekspedısıalarda jınastyrǵan ǵylymı derekterge súıenip, qazaq jeriniń tutastyǵyn dáleldep shyqty.
Nátıjesinde, sol jyly Avtonomdy Keńestik Respýblıka qurylyp, 1925-shi jyldan bastap oǵan halqymyzdyń tól «Qazaq» degen ataýy berildi.
Kóp uzamaı «Alash» arystary túgel qurbandyqqa ushyrasa da, olardyń ómiri men qaharmandyǵy zaıa ketken joq, búgingi Táýelsiz Qazaqstan – sonyń aıqyn dáleli.
Qurmetti Baqytjan Ábdiruly.
Kelesi, 2020 jyly memlekettilik turǵysynan bolashaq Táýelsiz Qazaqstannyń irgetasyna aınalǵan, KSRO quramyndaǵy Qazaq Respýblıkasynyń, naqtylap aıtamyn – Qazaq Respýblıkasynyń – qurylǵanyna 100 jyl tolady.
Bul rette, byltyr Ázerbaıdjan Respýblıkasy óziniń 100 jyldyǵyn atap ótse, al bıyl tipti Reseı prezıdenti V.Pýtınniń resmı jarlyǵymen «Alashordanyń» qurdasy – Bashqurt Respýblıkasy 100-jyldyǵyn toılaıdy.
Osyny eskere otyryp, «Aq jol» demokratıalyq partıasy:
- Birinshiden, Respýblıkamyzdyń 100-jyldyǵyna memlekettik dárejede kóńil bólinip, laıyqty deńgeıde ótkizýdy usynamyz.
Ol úshin ǵylymı konferensıalar uıymdastyryp, sol sheshimniń qabyldaýyna sebepker bolǵan qaıratkerlerdiń eńbekterin jarıalap, olardyń esimderin kósheler men mekemelerge berip, poshta markilerin, estelik monetalar shyǵarýdy suraımyz;
- Ekinshiden, Qazaqstan ataýmen qatar resmı túrde qoldanylýy úshin – Qazaq Respýblıkasy ataýyn qaıta engizý múmkindigin qarastyrýdy usynamyz.
Negizinde, mundaı bastamany 5 jyl buryn, «Máńgilik El» tujyrymdamasyn talqylaý barysynda Elbasy Nursultan Nazarbaevtyń ózi usynǵan bolatyn.
Bizdiń oıymyzsha Elbasymyzdyń ustanymyn iske asyratyn kez keldi.
Qarany – qara, aqty – aq, qazaqty – qazaq dep ataýymyz kerek.
Tipti totalıtarlyq sovet ókimeti moıyndaǵan Qazaq atyn Respýblıkamyzǵa qaıtarý – tek tarıhı ádiletti qurmetteý ǵana emes, sonymen qatar, barsha kópultty otandastarymyzdyń birligi men yntymaǵyn odan ári nyǵaıtýǵa serpin beretinine senimdimiz.
Qurmetpen, Aq jol fraksıasynyń depýtattary
