Qazaqstan prezıdenti Nursultan Nazarbaev Ulttyq bank tóraǵasy Danıar Aqyshevty qabyldady, dep habarlaıdy Qamshy.kz aqparat agenttigi Aqordanyń deregin negizge alyp.
Kezdesý barysynda memleket basshysyna Ulttyq banktiń 2018 jyly atqarǵan jumysynyń qorytyndysy jóninde esep berilip, eldegi valúta-qarjy naryǵynyń qazirgi ahýaly týraly baıandaldy.
Elbasy birqatar ekonomıkalyq ındıkatorlardyń oń qarqynmen ósip kele jatqanyn atap ótip, ınflásıa deńgeıin tómendetý úshin qabyldanyp jatqan sharalardyń tıimdiligi týraly máselege toqtaldy.
"5,3 paıyz deńgeıindegi ınflásıa – bul jaqsy kórsetkish. Biraq, buǵan ekonomıkanyń tıimdiliginen emes, naryqtaǵy ótimdilik kóleminiń qysqarýy esebinen qol jetkizilip otyr. Ulttyq bank pen Úkimettiń bul baǵyttaǵy jumysy nashar. Qarajatty aınalymnan shyǵarý arqyly ınflásıany odan ári tómendetýge bolady, biraq bul sheshimniń ekonomıkaǵa qalaı áser etetini belgisiz. Sonymen qatar, uzaq merzimdi nesıelerdiń azaıǵanyn baıqaýǵa bolady", – dedi Nursultan Nazarbaev.
Qazaqstan prezıdenti qoldanystaǵy zańnamaǵa birqatar ózgerister engizilgenine toqtalyp, Ulttyq bank tarapynan bul salaǵa tıisti baqylaý júrgizilýi qajet ekenin aıtty.
Danıar Aqyshev Memleket basshysynyń Qazaqstan halqyna arnalǵan joldaýynda aıtylǵan qaıta óńdeý ónerkásibin nesıeleý jónindegi tapsyrmalardyń oryndalý barysy týraly áńgimeledi.
Sondaı-aq, Ulttyq bank tóraǵasy Qazaqstan prezıdentine ulttyq valúta baǵamynyń ózgerýine yqpal etetin faktorlar týraly baıandady.
"Teńgeniń AQSH dollaryna shaqqandaǵy aıyrbas baǵamy jyl ishinde 15,6 paıyzǵa tómendedi. Buǵan, negizinen, syrtqy faktorlar sebepshi boldy. Álemdegi munaı baǵasy óte qubylmaly bolyp otyr. Syrtqy jaǵdaılar, sonyń ishinde qoldaýshylyq pen sanksıalyq saıasat ta turaqty emes. Deı turǵanmen, erkin aıyrbas baǵamy rejimi barlyq aýyrtpalyqty jeńildetip, ótken jyldyń sońynda 30,9 mıllıard AQSH dollaryn quraıtyn altyn valúta rezervin saqtap qalýǵa múmkindik berdi. Ulttyq qordyń shetel valútasyndaǵy aktıvi 57,7 mıllıard AQSH dollaryna jetti", – dedi Elbasy.
Danıar Aqyshev qarjy naryǵyn nesıeleý jáne saýyqtyrý úshin atqarylyp jatqan jumystar jóninde málimdedi.
"Biz qarjy sektoryn jaqsartý arqyly naryqqa laıyqty qatysýshylardyń jumysyn ilgeriletýge múmkindik beremiz. Tıisti sharalar qabyldanǵannan keıin nesıe kólemi aıtarlyqtaı artady dep oılaımyz. Bul kórsetkish 2019 jyly 10 paıyzǵa ósedi dep boljamdap otyrmyz. Bul nomınaldy ishki jalpy ónimnen joǵary. Tıisinshe, nesıelerdiń qol jetimdiligi artyp, birte-birte jaǵdaı jaqsara túsedi. Biz keleshekte problemalar týyndatýy múmkin kúrt ósimnen góri teńgerimdi ósimdi maqul kóremiz", – dedi Nursultan Nazarbaev.
Kezdesý sońynda Qazaqstan Prezıdenti birqatar naqty tapsyrma berdi.
Usynǵan: Ásel Bolatqyzy
