AQSH polısıasy Qazaqstan azamatyn alaıaqtyq jasady degen kúdikpen ustady dep jazady Qamshy.kz aqparat agenttigi ktk.kz saıtynyń deregin negizge alyp.

24 jastaǵy Mahabbat Ábdýalıeva ózin rıeltor retinde tanystyryp, Nú-Iorkte páter jaldaýǵa kómektesemin dep birneshe adamnyń aqshasyn jymqyryp ketken.

AQSH aqparat quraldarynyń málimdeýinshe, Mahabbat 24 qańtar kúni ustalǵan. Onymen birge taǵy bir er adamnyń kúdikke ilingeni aıtylady. Biraq, ol áli tabylmaǵan. 

Derek kózderge súıensek, jerlesimiz áleýmettik jelide ózin jyljymaıtyn múlik rıeltory, ıaǵnı, jalǵa beriletin páter taýyp berýmen aınalysatyn adam retinde tanystyrǵan. Sóıtip, byltyr jurttan aldyn ala tólem retinde aqsha alyp, taqyrǵa otyrǵyzypty. Klıentterden 200 ben 700 dollar aralyǵynda alyp otyrǵan deıdi.

Óziniń áleýmettik jelidegi paraqshasynda Astanadan ekeni, AQSH pen Malaızıanyń myqty joǵary oqý oryndaryn bitirgenin jazyp qoıypty. Qalǵan málimetterdiń anyq-qanyǵyn Qazaqstannyń Nú-Iorktegi konsýldyǵy anyqtap jatyr.

Usynǵan: Ásel Bolatqyzy