Túrkistan oblystyq kámeletke tolmaǵandar isi jónindegi mamandandyrylǵan aýdanaralyq soty "qorqytyp alý" jáne "ózin-ózi óltirýge deıin jetkizý" babymen aıyptalǵan mektep oqýshysy Nurbek Tursynhandy kináli dep tanyp, úsh jylǵa bas bostandyǵynan aıyrý jazasyn kesti dep habarlaıdy Qamshy.kz aqparat agenttigi Azattyqtyń deregin negizge alyp.

Shymkent qalasy Qarataý aýdany Qaınarbulaq shaǵyn aýdanyndaǵy 83-mekteptiń oqýshysy Nurbek Tursynhan 2018 jyldyń 10 aqpanynda óz úıinde ózine qol salyp, qaıtys bolǵan mektep oqýshysy Ersultan Ahmetovti ózin-ózi óltirýge jetkizdi jáne osy mekteptiń jıyrma shaqty oqýshysynan aqsha bopsalap, qysym kórsetken dep aıyptalǵan.

Marqum Ersultan Axmetovtyń ápkesi Uljan Aqylbekova úkimmen kelispeıtinin, sottan isti qaıta tergeýge jiberýdi surap, apelásıalyq shaǵym túsiretinin aıtady.

Baspasóz qyzmetiniń málimetinshe, is ashyq qaralǵan.

Nurbek Tursynhannyń isi sotqa jetkennen keıin on oqýshy aıyptalýshynyń ústinen aryz jazbaǵandaryn málimdegen. İske tóraǵalyq etken sýdıa Qaırat Qońyrbaev isti tergegen tergeýshilerdiń biri Musa Álkeevten "Jábirlenýshi dep tanylǵan kámelet jasyna tolmaǵan balalardyń jaýaby men olardyń ata-analarynyń aryzynan bólek taǵylǵan aıypty dáleldeıtin ne bar?" dep suraǵan. Tergeýshi naqty jaýap bere almaǵan.

Qaıtys bolǵan oqýshy Ersultan Ahmetovtyń ata-anasy aryzdy Nurbek Tursynhannyń ústinen emes, ózge tórt oqýshynyń ústinen túsirgenin, olar tergeý kezinde jábirlenýshi dep tanylǵanyn aıtqan.

Qarataý aýdandyq soty Qaınarbulaq shaǵyn aýdanyndaǵy 83-mekteptiń 11-synyp oqýshysy Nurbek Tursynhandy (2018 jyly mektep bitirýi tıis bolǵan) Qylmystyq kodekstiń 194-baby ("Qorqytyp alýshylyq") boıynsha kúdikti dep tanyp, eki aıǵa qamaýǵa sanksıa bergen. Qylmystyq kodekstiń "ózin-ózi óltirýge deıin jetkizý" baby boıynsha aıyp tergeý kezinde taǵylǵan.