Nursultan Nazarbaev Brazılıa Federatıvtik Respýblıkasynyń Prezıdenti Jaır Messıas Bolsonarýǵa kóńil aıtý jedelhatyn joldady dep habarlaıdy Qamshy.kz aqparat agenttigi Aqordaǵa silteme jasap.  

Memleket basshysy Nursultan Nazarbaev Mınas-Jeraıs shtatyndaǵy bógettiń buzylýy saldarynan kóptegen adamnyń qaza bolǵany týraly habardy zor kúızelispen qabyldady.

"Osyndaı qıyn sátte Qazaqstan halqynyń jáne jeke ózimniń atymnan Sizge, qaza tapqandardyń týǵan-týysqandary men jaqyndaryna, sondaı-aq barsha Brazılıa halqyna kóńil aıtamyn. Qaıǵylaryńyzǵa ortaqtasa otyryp, zardap shekkenderdiń tezirek saýyǵyp, otbasylaryna oralýyna tilektestigimdi bildiremin", - delingen jedelhatta.

Aıta ketsek, ótken aptada Mınas-Jeraıs shtatyndaǵy Brýmadınú mýnısıpalıtetinde bóget jaryldy. Jeksenbide 58 adamnyń qaıtys bolǵany jáne 305 adamnyń iz-tússiz joǵalyp ketkeni habarlandy. Osyǵan deıin 37 adam qaıtys bolǵany jáne 280 adam izdestirilip jatqany aıtylǵan.  Laı astynan qazylyp shyǵarylǵan jolaýshylary bar avtobýsty tapqannan keıin qaıtys bolǵandar sany ósken. 

Usynǵan: Ásel Bolatqyzy