Almaty oblysynda azamattyq nekedegi kúıeýi áıelin birneshe jerden pyshaqtap, aıýandyqpen óltirip tastady. Tergeý málimetinshe, erli-zaıyptylar arasyndaǵy kıkiljiń dastarhannyń ústinde bastalǵan. Araqqa sylqıa toıyp alǵan olar sózge kelip qalyp, aralarynda daý-damaı týyndaǵan. Sol sátte ashýǵa býlyqqan er adam kelinshegine pyshaq ala júgiripti. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.

«Men ony qýyp jetip, ishinen urýdy oıladym. Biraq qolymda pyshaq bolǵan eken. Sol pyshaqpen birneshe ret ishinen uryppyn, shamamen qansha ret urǵanym esimde joq» - deıdi kúdikti. 

Qaıǵyly oqıǵa Qarasaı aýdanyna qarasty Jańaturmys aýylynda bolǵan. Eldi- mekendegi jer úılerdiń birinen kóptegen pyshaq jaraqatyn alǵan 37 jastaǵy baspana ıesiniń jansyz denesi tabylǵan. Qaskúnem onyń betin de aıaýsyz tilgilep tastaǵan. Oblystyq polısıa departamentiniń málimetinshe, 45 jastaǵy er adam ol áıelmen zańdy nekede bolmaǵan, alaıda birneshe jylda beri birge turyp kelipti. Qazirgi tańda ol ýaqytsha ustaý ızolátoryna qamaldy.

«Qazaqstan Respýblıkasy Qylmystyq kodeksiniń 99- babyna sáıkes, adam óltirý deregi boıynsha sotqa deıingi tergeý amaldary júrgizilip jatyr. Oqıǵa ornynan tabylǵan qylmys quraly bolýy múmkin degen as úı pyshaǵy tárkilendi. Tárkilengen pyshaq qazirgi tańda is materıaldaryna aıǵaq zat retinde tirkeldi» - deıdi oblystyq polısıa departamenti baspasóz qyzmetiniń resmı ókili Aıgerim Kópbaeva.  

Usynǵan: Nazerke Labıhan