Qazirgi kezde ár jerde kóbeıip ketken mektep oqýshylarynyń arasyndaǵy tóbeles, túrli oqıǵalarǵa baılanysty Máýlen Áshimbaev óziniń Facebook paraqshasynda pikir bildirdi, dep habarlaıdy Qamshy.kz aqparat agenttigi.
"Sońǵy kezderi áleýmettik jelilerde mektep oqýshylarynyń jaǵa jyrtysqan vıdeolary jıilep ketkenin baıqap júrmiz. Eldi dúrliktirgen sol keleńsizdikterdi kórip, bizden de maza qashty. Óıtkeni, bul túske deıin shekisip, tústen keıin dostasyp ketetin oıyn balasynyń isi emes. Bul – qoǵamdaǵy keıbir máseleniń ózegi qaıda jatqanyn aıqyn kórsetip bergen dabyl qaǵarlyq jaǵdaı.
Iá, bárimiz de jas boldyq. Onyń ústine, bizdiń jastyq shaǵymyz 80-jyldarǵa tap kelip, burylysy men qıylysy kóp joldardan ótýge májbúr bolǵanymyzdy da jasyrmaımyz. Óıtkeni sol jyldarda Almatyda jastar arasynda qalyptasqan jaǵdaıdyń ózi soǵan jeteleıtin. Biraq ol kezdegi júıe, ıdeologıa, tipti sebep te basqa bolatyn. Sonyń ózinde dál mundaı soraqylyqqa jol berilmeýshi edi. Tipti ol kezde qazaqı ortada ósken balalarda bir-birine degen meıirim, aıaýshylyq degen sezimderdiń basym bolǵanyn erekshe atap ótken jón.
Al qazir táýelsiz el atanyp, óz qolymyz óz aýzymyzǵa jetkende, til, dil, din sıaqty asyl qundylyqtarymyz qaıta ústemdik qurǵan shaqta osyndaı oqıǵanyń bolýy kóńilge qaıaý túsiredi. Mundaı keleńsizdiktiń úlkenge qurmet, kishige izet kórsetýge úgitteıtin qazaqy tárbıege jat qylyq ekeni belgili. Sonda ol balalardyń besikten beli shyqpaı jatyp, bir-birine osynshalyqty óshigýleriniń sebebi ne?
Menińshe, bul suraqtyń jaýaby tym tereńde jatyr. Aldymen, biz qazirgi tańda qoǵamdaǵy keıbir qundylyqtardyń quldyrap ketkenin jáne bala tárbıesinde ata-ana men mektep arasyndaǵy úılesimniń úzilgenin moıyndaýymyz kerek. Osy túıtkilderdiń aldyn alý úshin máseleniń saldarymen ǵana emes, sebebimen de kúresýdi qolǵa alǵan abzal. Iaǵnı, jasóspirimderge arnalǵan túrli úıirmeler men ortalyqtar ashyp, olardyń qoljetimdiligin qamtamasyz etýdiń mańyzy zor. Ásirese, osy úrdis aýyldyq jerlerde júıeli jolǵa qoıylyp, balanyń mektepten tys ýaqytyn paıdaly nársege jumsaýyna jaǵdaı jasalýy tıis.
Ras, bul salada memleket tarapynan aýqymdy jumystar atqarylyp jatyr. Elbasy osy baǵytty únemi basty nazarda ustap keledi. Keshegi ótken «Jastar jylynyń» resmı ashylý saltanatynda da Memleket basshysy tárbıe máselesine erekshe kóńil bólip, balany joǵary synyptardan bastap úlken ómirge beıimdeýdiń bereri mol ekenin aıtty. Sondyqtan mektepterde bilim berýmen birge, óskeleń urpaqtyń tulǵa bolyp qalyptasýyna, olardyń boıyna durys qundylyqtardy sińirýge baǵyttalǵan keshendi jumystar istelýi kerek.
Árıne, tárbıeniń eń basty taban tireıtin jeri otbasy. Sol sebepti, bala tárbıesindegi negizgi salmaq ta, jaýapkershilik te ata-anaǵa júkteledi. Ár ata-ana osyny sezinip áreket etýi tıis.
Túıindep aıtqanda, mundaı jaǵdaıǵa ata-ana, mektep jáne tutas qoǵam birdeı jaýapty. Sondyqtan jas býynnyń ómirden óz ornyn taýyp, ulaǵatty urpaq bolyp qalyptasýyna asa mán berilip otyrǵan «Jastar jyly» aıasynda jastardy tárbıeleýge baǵyttalǵan ıgi isterdiń sátti júzege asyrylýyna búkil qoǵam bolyp atsalysaıyq", - dep jazady Máýlen Áshimbaev.
Usynǵan: Nazerke Labıhan
