Memleket basshysy mınıstrler men ákimderge kúndiz-túni jumysty oılaýǵa keńes berdi dep jazady Qamshy.kz aqparat agenttigi sputniknews.kz saıtynyń deregin negizge alyp. Qazaqstan prezıdenti Nursultan Nazarbaev úkimet otyrysynyń sońynda mınıstrler men ákimderdi maqtap, olarǵa senetinin aıtty.

Úkimettiń keńeıtilgen otyrysynyń sońynda mınıstrler men ákimder prezıdentten maqtaý sóz estidi.

"Barlyǵyńdy tańdap otyryp taǵaıyndadym: ákimderdi de, senderdi de (mınıstrlerdi). Sender basqa memlekettik qyzmetkerlerdi taǵaıyndadyńdar. Sondyqtan bizdiń bir-birimizdiń aldymyzdaǵy jaýapkershiligimiz birdeı. Men árqaısyńdy, qandaı qabiletteriń, bilimderiń men tájirıbeleriń bar, barlyǵyn bilemin. Búgingi úkimet qandaı maqsat bolsa da, isteı alady, qolynan keledi. Biraq ózin-ózi qamshylap, jumys istetkizý kerek. Kúndiz-túni jumysty oılaý kerek", — dedi Nazarbaev otyrysty qorytyndylap. 

♦Elbasy: Sender, mınıstr emes, qorqaqsyńdar...

Osy oraıda memleket basshysy qazaqtyń maqalyn keltirdi. 

"Aıtqannyń aýzy jaman, jylaǵannyń kózi jaman" degen sóz bar. Men senderdi renjiteıin dep surap otyrǵan joqpyn, senderge sengennen keıin aıtyp otyrmyn", — dedi Elbasy. 

Nazarbaev úkimet pen ákimderge birigip, halyqtyń tabysyn kóterip, ál-aýqatyn jaqsartýdy tapsyrdy.

"Qaı óńirde halyqtyń turmysy, jalaqysy ósse, sol aımaq jaqsy. Mine, osyndaı krıterıı qoıý kerek. Ol úshin strategıalyq memlekettik baǵdarlamalar, ásirese, Ult jospary, joldaýlar men basqa da mindetterdiń  sapaly ári tıimdi oryndalýy úkimettiń basty mindeti bolýy tıis. Bilimderiń de, jigerleriń de, baǵdar da bar, ony oryndaıtyn resýrstar da bar", — dep túıindedi sózin prezıdent.