Venesýela prezıdenti Nıkolas Madýro AQSH prezıdenti Donald Tramptyń ózin óltirmek bolǵany jaıynda málimdedi. Bul týraly Madýro Rıa novostı saıtyna bergen suhbatynda aıtqan, dep jazady Qamshy.kz aqparat agenttigi.

– Donald Tramp Kolýmbıa bıligi men kolýmbıalyq jendetterge aıtyp, meni óltirtpek bolǵan. Eger aldaǵy ýaqytta maǵan bir nárse bolsa, Donald Tramp pen Kolýmbıa prezıdenti Ivan Dýke barlyq jaýapkershilikti óz moınyna alady, - deıdi Venesýela prezıdenti.

– Aldaǵy kúnderi jendetter shabýyl jasaýy múmkin be?,- degen suraqqa Nıkolas Madýro «Meniń ómirim - Qudaıdyń qolynda», - dep jaýap bergen.

29 qańtar kúngi baspasóz máslıhatynda AQSH Ulttyq qaýipsizdik keńesshisi Djon Boltonnyń qolyndaǵy aq qaǵazdaǵy jazý  jýrnalıserdiń nazaryna ilikken. Onda «Aýǵanstan mámilege kelýge daıyn, Kolýmbıaǵa 5000 soldat jiberý», - degen jazýdy jýrnalıserdiń kózi shalyp qalǵan.

Aıta keteıik, ótken jyldyń tamyz aıynda belgisiz bireýler Madýroǵa qastandyq jasap, ony óltirmekshi bolǵan. Ol sóz sóılep turǵan kezde bázbireýler jarylǵysh zat bar drondardy Venesýela prezıdenti turǵan jaqqa qaraı baǵyttaǵany belgili. Atalmysh oqıǵaǵa qatysty eki laýazymdy áskerı qyzmetker qolǵa túsken.

Usynǵan: Nazerke Labıhan