Balalardyń ata-anasy qaıǵyly oqıǵa kezinde jumysta bolǵan. Olardyń úlkeni 12 jasta, kishisi jasqa tolmaǵan edi dep jazady Qamshy.kz aqparat agenttigi sputniknews.kz saıtynyń deregin negizge alyp. 

Astanada jeke úılerdiń birinde bolǵan joıqyn órt saldarynan 5 bala qaza tapty, dep habarlaıdy QR ishki ister mınıstrliginiń tótenshe jaǵdaılar komıteti.

Qaıǵyly oqıǵa dúısenbige qaraǵan túni bolypty. Saryarqa aýdany Shyńǵystaý kóshesinde ornalasqan "vremánkada" túngi úshte órt shyqqan. Kóp uzamaı ýaqytsha salynǵan baspananyń shatyry qırapty. Tilsiz jaý týraly habar órt sóndirý qyzmetine 03.24 kezinde jetken, órt sóndirýshiler jalyndy bir saǵattan soń sóndirdi. Janyp ketken úıden 2006, 2008, 2013, 2015 jáne 2018 jyldary týǵan balalardyń denesi tabylǵan.

Olardyń ata-anasy tótenshe oqıǵa kezinde jumysta bolypty.

Órt aýmaǵy – 30 sharshy metr, jalyndy sóndirýge 17 órt sóndirýshi men 5 kólik qatysqan, budan bólek tótenshe jaǵdaılar komıtetiniń ortalyq óńirlik aeromobıldi jedel qutqarý jasaǵynan tórt adam men bir kólik jumyldyrylǵan.