Búgin Úkimettiń selektorlyq otyrysynda İshki ister mınıstri Qalmuhanbet Qasymov búkil jurtty eseńgiretken qaıǵyly oqıǵa - 5 búldirshin qaza tapqan órttiń sebepterin aıtty, dep jazady Qamshy.kz aqparat agenttigi.

Onyń aıtýynsha, jylý berý maýsymy bastalǵannan beri órt azaıǵanymen, ýlanýdan qaza tapqan adamdardyń sany 12 paıyzǵa artyp otyr. 

-11 aılyqtan 12 jasqa deıin 5 bala qaza tapty. Órttiń sebebine keler bolsaq, pesh jaqqanda qaýipsizdik sharasy saqtalmaǵan. Órt sodan shyǵyp otyr. Sodan keıin balalar túngi ýaqytta qaraýsyz qalǵan. Órt sóndirýshiler 7 mınýtta jetken. Polısıa men jedel járdem de osy ýaqytta bolǵan. Biraq, ókinishke qaraı jaǵdaıdyń aldyn alýǵa múmkindik bolmady, - dedi Q.Qasymov.

Mınıstr Qasymov elimizde qazirgi ýaqytta mundaı jaǵdaılar az emes ekendigin, degenmen, jylý berý maýsymy ótken jyldyń 15 qazanynda bastalǵannan beri órt birshama azaıǵanyn aıtyp ótti.

-Eń bastysy, qaza tapqandardyń sany azaıdy. Biraq, ýlanýdan qaza bolǵandar sany 12 paıyzǵa artyp otyr. Jyl saıyn bizdiń órtke qarsy qyzmet aldyn alý sharalaryn júrgizedi. Sońǵy birneshe aıda 1,7 mln jeke úıdi aralady. 4 mln adammen kezdesip, túsindirý jumystaryn júrgizdi. Osy jaǵdaıǵa baılanysty taǵy jumysty jalǵastyramyz, - dedi mınıstr.

 Úkimettiń selektorlyq otyrysynda  premer-mınıstr Baqytjan Saǵyntaev órtten qaza tapqan 5 balanyń ata-anasyna kóńil aıtty.