Tanymal ánshi Madına Sádýaqasova "7 arnadaǵy" “Moıa ıstorıa” baǵdarlamasynyń jýrnalısi Maııa Bekbaevaǵa bergen suhbatynda kúıeýimen qarym-qatynastary jaıly áńgimelep berdi. “Oljas (kúıeýi) rasymen de meni súıetin adam. Ol maǵan óte qymbat. Ol óz mahabbatyn barynsha dáleldep berdi. Ózi televızıada qyzmet atqarady. Ekeýimiz 2009 jyly túsirilimde alǵash tanysqanda men ony elemeıtinmin. Bir kúni ol maǵan habarlama jazyp, bir shoq gúlder usyndy. Sodan beri jubymyz jazylǵan emes”, – dep aǵynan jaryldy ánshi. Mádınanyń oıynsha, qazirgi kezde názik jandylardyń er kisiniń aldynda óziniń myqtylyǵyn kórsetýi – otbasyna kedergi bolar basty másele. “Men áıelder názik, sulý ári er kisiniń qorǵaýynda bolýy úshin jaratylǵan dep oılaımyn. Óz erlerinen myqtyraq keletin áıelder olardyń artyqshylyqtaryn sezinýine múmkindik bermeıdi jáne bul qazirgi kezde basty másele bolyp otyr”, – deıdi ánshi. Sádýaqasova suhbat barysynda bala kezden ánshi bolýǵa talpynǵanyn jasyrmady. “11 jasymda men sol kezde tanymal bolǵan “Ánshi balapan” mýzykalyq baıqaýyna qatystym. Keıin Qyzylordadaǵy “Tań sholpan” baıqaýyn jeńýden úmitti boldym. Alaıda, ózimdi qansha juldyz sezinsem de, tipti kelesi týryna ótpeı qaldym. Degenmen, jeńiliske bola salym sýǵa ketken joq. 3 jyl boıy atym shyǵa qoımasa da, kishkentaıymnan ánshi bolý armanymnan bir sátke alystaǵan emespin. Aqyry 1996 jyly Qyzylordada “Mýzykalnyı voıaj” baıqaýyn utyp aldym”, – deıdi Sádýaqasova. “Mahabbat jalyny” ánimen jurtshylyqty baýraǵan Mádına ániniń tanymal ánder ishinde alǵashqy úshtikke engenin avtobýsta otyrǵanda radıodan estigen eken. “Sol kezde men ónerim eldiń júregin jibitkenin uǵyp, prezıdenttik orkestrmen shartymdy buzdym. Almatyǵa kelip, ónerde jańa belesti bastadym”, – deıdi ánshi. Almatyǵa arman qýalap kelgen Mádına barlyq merekelik is-sharalardan qalyspaı, ónerge tolyqtaı bet burypty. Ánshi ónerden bólek jeke ómiri men otbasy jaıly da baıandap berdi. “Jarty jyl buryn meniń týǵan kúnimde Oljas (kúıeýi) usynys jasady. Keıin uzatý, toı bolyp, aqyry ekeýimiz erli-zaıypty atandyq. Birge atyrǵan alǵashqy tańymyzda kúıeýim maǵan qarap, “Madına, biz endi erli-zaıyptylarmyz” dedi. Sol kezden men joldasyma óz ótkenim jaıly til qatpaýǵa ýáde berdim (ánshiniń alǵashqy nekesi sátsiz bolǵan)”, – deıdi ánshi. Sádýqasova búgingi kúnde 9 aılyq ulyn tárbıelep otyr. Ana atanýy ónerin qatar alyp júrýge qıyndyqtar týǵyzǵanymen ánshi óziniń baqytty ekendigin aıtýda.