Búgin Almaty qalalyq máslıhatynyń V-shaqyrylymynyń 39-sessıasy ótti. Sesıa barysynda máslıhat depýtattary Almaty qalasy ákiminiń oryntaǵyna Prezıdent Nursultan Nazarbaev usynǵan eski ákim Ahmetjan Esimovtyń kandıdatýrasyn maquldady.

Ahmetjan Smaǵululy Esimov 1950 jyly 15 jeltoqsan kúni burynǵy Qaskeleń aýdanynda dúnıege kelgen. Qazaq Aýylsharýashylyq ınstıtýtyn támamdaǵan (1974 j), ınjıner-mehanık.

Ataq - dárejeleri, qyzmetteri:

- Ekonomıka ǵylymdarynyń doktory (1999 j)

- Almaty oblystyq partıa komıtetiniń hatshysy (1988-1990 jj)

-Almaty oblystyq ákimshiligi basshysy (02,1992-10,1994 jj)

- QR Premer-mınıstri orynbasary (10,1994-03,1996 jj)

-QR Memlekettik hatshysy (03,1996-10,1996 jj)

- QR Prezıdent ákimshiligi jetekshisi (07,1996-10,1996 jj)

- QR Premer-mınıstri birinshi orynbasary (10,1996-02,1998 jj)

- Belgıa, Nıderlandy, Lúksenbýrg, elderinde QR tótenshe jáne ókiletti elshisi qyzmetterin atqardy.

-QR Aýylsharýashylyǵy mınıstri (2001-2004 jj)

-Almaty qalasy ákimi (2008 jyldan beri qaraı)

Sonymen, "jańa-eski" degen jańa tirkeske de búginde qulaǵymyz úırene bastaǵandaı. Jeti jyldan beri Almatynyń ákimi qyzmetinen túspeı kele jatqan Ahmetjan Esimov eldiń esinde nesimen qaldy? Esimovtyń el aýzynda aıtylyp júrgen kemshilikterin tizbelep kóreıik...

1. Sol baıaǵy órtengen bazarlardan bastaımyz. "Baraholka" bazary birinen soń bir órtenip jatty. Júzdegen saýdagerdiń mıllıard teńge jýyq taýarlary bir-aq sátte órtenip ketti. Tilsiz jaý taýardyń túgin qaldyrmaı jalmap ketkende, qalalyq ákimshilik ne bitirdi? Iá, damyǵan elderdegi úrdister boıynsha, jınaqy saýda-ortalyqtaryna kóshý jaqsy bastama ekeni ras. Alaıda, qara halyqty masa qýǵandaı, tútin salyp, kóshirý qanshalyqty durys? Búginde sol "Baraholka" atymen joq bolǵan.
2. Almatyda Sán jáne dızaın kolejinde, sabaq ústinde bomba jaryldy. Oqýshy qaza boldy. 12 stýdent túrli dene jaraqatyn aldy. Shý birazǵa deıin bardy. Muǵalim eki aıǵa qamaldy. Keıin bosap shyqty. Jaqynda, Óner akademıasynda da órt shyqty. Qudaıǵa shúkir, zardap shekkender joq edi.
3. Táýelsizdik kúni qarsańynda, ákim myrza, týǵan kúnin toılaýǵa, qaladan shyǵyp ketti. Óıtkeni, ol týǵan kúninde qalada "bolǵysy kelmeıdi" eken. 15 jeltoqsan Ahmetjan myrzanyń týǵan kúni. Al ertesi "jáı bir" Táýelsizdik kúni edi ǵoı.
4. Turǵyn úı máselesi. "Vethoe jıle" baǵdarlamasy boıynsha, eski sharshy metr jerge, jańa sharshy metrdi aıyrbastaý. Bul baǵdarlama boıynsha, 400-den astam páter ıesi jańa páterlerge kóshýi tıis bolatyn. Alaıda, munyń da arty daýǵa ulasty. Tipti, ákim myrza, ózine syn aıtqan azamattyq belsendilerdiń ózderin synǵa aldy.
5. Qalanyń quramynda bolsa da, áli kúnge deıin kógildir otynnyń qyzyǵyn kóre almaı júrgen almatylyqtardyń janaıqaıy da Esimovtyń qulaǵyna jetti. Halyq shyryldady. Esimov ýáde etti. "Qaztransgaz" basshylarymen kelisip otyryp, 20 paıyzdan 50 paıyzǵa deıin jeńildikter jasaýǵa ýáde berdi. Dese de kúni búginde ár úıge kógildir otyn tartý quny 300 myń teńgeniń tóńireginen túspeı keledi.
6. "Kók jaılaý" týrısik kesheni. 1,5 mıllıard dollar ınvestııa tartylǵan keshenniń kemsin tustary jeterlik. Osy jolǵy esep berý jınalysynda Esimov myrza, ádettegideı, "Kók jaılaý" úshin kúresetinin aıtqan. Aıtpaqshy, Esimov myrzanyń sol esep berý jıynyna kelgen, oppazısıoner (qarsylastary) dostaryn polısıa qamap qoıǵan bolatyn.
7. Sondaı-aq, Esimov myrzanyń enshisinde sheshýin tappaǵan - ekologıa, kólik problemasy, qoqys qaldyqtaryn kádege jaratý, Kókjaılaý shatqalynda qurylys júrgizýge qatysty máseleler taǵy bar.
8. Sońynda, taǵy da órt. "Adem" saýda ortalyǵy túgeldeı órtenip ketkende qala ákimi nege saýdagerlerge baryp, jaǵdaılaryn bilýge asyqpady?
9. Kópir qulady. Kisi qaza boldy. Kópir qurylysyna jaýapty kompanıa sheteldiń enshisine, Reseıge tıeseli bolyp shyqty. Onda da ákim lám-mım dep tis jarǵan joq.
10. Qala terıtorıasyna jańadan kirgen aýdandar men qalamańy aýyldardyń jol máselesi áli sheshimin tapqan joq. Jyl saıyn kóktem men kúzde halyq qara batpaq keship, laı sýdyń astynda qalady...

Túıin: Prezıdent jarlyǵymen qaıta saılanǵan ákimge synshy kóp-aq. Elbasynyń til jóninde ustanǵan saıasaty men toleranttylyqty shatastyryp alatyn ákimderdiń qatarynda dál, osy Esimov myrza da bar edi. Ol resmı jıyndarda únemi resmı tilge júginedi. Oryssha sóıleıdi, odan qalsa aǵylshynsha saıraıdy. Tipti, blogerlermen kezdeskende qazaq tildi BAQ-ty qaramaıtynyn ashyq aıtty. Esh qymsynbastan. Qazaqshaǵa shorqaq emes-aý, nıet bildirgisi kelmeıdi. Áıtpese, qazaqy aýyldyń týmasy ǵoı. Kóńiljyqpastyq, jigersizdik, namyssyzdyq... Aıta-aıta jaýyr bolǵan taqyryp.

Búgin Almaty qalasyn jeti jyldan beri basqaryp kele jatqan Ahmetjan Smaǵululy Esimov myrza qaıta ákim bolyp saılandy. Biz joǵaryda tizbelep ótken, kúrmeýi sheshilmeı kele jatqan máseleler ákim myrzanyń aldaǵy ókiletti merziminde nazarynan tys qalmaıdy jáne másele sheshimin tabady dep senemiz.

Nurgeldi Ábdiǵanıuly

Sýret: "Azattyqtan"