Keshkisin jumystan kelip tize búkkenim sol edi, bastaýysh mekteptiń ekinshi synybynda oqıtyn balam: - Áke, álemde neshe Qazaqstan bar ? - dep suramasy bar ma. Áýelde bala sózine tolyq mán bermegen men, samarqaý únmen: - Jalǵyz ǵana Qazaqstan bar - dedim. - Sonda qalaı, - dedi balam kózin maǵan qadap, - myna teledıdardyń bir arnasyna qosylsań jaqsy, ádemi Qazaqstandy kórsetedi de, basqa arnasynda múlde basqa Qazaqstandy kóresiń. Onda neshe túrli apattardy, jylaǵan adamdardy, tozǵan joldardy, qylmyskerlerdi kóresiń, men ol Qazaqstanda turǵym kelmeıdi, qorqam, - dedi kináli jandaı janaryn tómen salyp. Men sonda baryp onyń neni meńzep turǵanyn túsindim de, balamdy qushaǵyma alyp: - Qoryqpa balam, ákeń bar da eshteńeden alańdama. Óziń aıtqan jaqsy, jaman Qazaqstanda biz turamyz. Ol jaqsy bolsyn, jaman bolsyn báribir bizdiń uly otanymyz. Odan basqa memleketimiz joq, - dedim balamnyń maıda shashtaryn aıalaı sylap. Balam názik te jyly qoldarymen moınymnan qushaqtap, meniń sózim men demimnen bir senim men tynyshtyq tapqandaı tura berdi. Men balamdy jubatyp turǵanymmen sanam samǵap baıtaq qazaq dalasyn aralap ketti. ... "Ras-aý, men qaısy Qazaqstanda turamyn?" degen suraqqa jaýap izdep sharq urdy. Balalar muńaısa ákelerine arqa súıeıdi, al ákeler qaıǵyrsa arqa súıer eli bolǵanǵa ne jetsin. "Qaısy Qazaqstanda tursam da, áıteý Qazaqstannym bolǵany úshin shúkir, baqyttymyn" dedim ishimnen. Qaster Sarqytqan