Álemdegi jalǵyz symsyz qanaınalym qurylǵysy 24 jastaǵy Ismaıl Tursynovtyń júregine ornatyldy, dep xabarlaıdy Qamshy.kz aqparat agenttigi.

«Men ony ǵaryshqa ushqan kosmonavtqa teńeıtin edim. Sebebi oǵan álem boıynsha alǵash ret ınovasıalyq qurylǵyny ornatý operasıasy jasaldy. Naýqas bolyp túskende ol óz bólmesinen shyǵa almaıtyn, qatty demikpesi boldy. Sol sebepti únemi dárigerlerdiń baqylaýynda júrdi. Qazir jaǵdaıy jaqsy, dalada qydyrady, sport zalynda jattyǵady, tipti, baseınge de túse alady», - dedi «Ulttyq ǵylymı kardıohırýrgıa ortalyǵy» AQ basqarma tóraǵasy Iýrıı Pá Ortalyq komýnıkasıalar qyzmetinde.

Jańa apparattyń batareıasy keýdeniń ishinde sol jaqta ornatylǵan. Ony arnaıy belbeý arqyly magnıttik tolqynmen zarádtaıdy. Al arnaıy qolsaǵat júrektiń soǵýyn, qannyń qysymyn jáne taǵy basqa málimetterdi kórsetip turady. Al qanaınalym qurylǵysyn zarádtaý ońaı, onyń qýaty 8 saǵatqa jetedi.

Inovasıalyq qurylǵy Izraılde jasalǵan. Onyń qyzmeti kádimgideı kardıostımýlátormen birdeı.

«Buryn deneden sym shyǵatyn jerde bakterıalar jınalatyn, ol jerdi únemi emdep otyrý qajet. Al jańa qurylǵyda ondaı symdar joq. Úlken sómkeni birge alyp júrýdiń qajeti de shamaly. Adam eshbir kedergisiz júre alady, dýshqa túse alady jáne taǵysyn taǵy. Atalǵan apparat adamnyń aǵzasyna tolyǵymen ornatylady. Sonyń nátıjesinde ómir súrý sapasy da jaqsarady», - dep atap ótti Iý.Pá.

Onyń aıtýynsha, alǵashqy operasıadan keıin Ismaıl Tursynov dárigerlerdiń baqylaýynda bolady. Bári sátti bolsa, jańa texnologıanyń kýáligin alý josparlanǵan. Sodan keıin ony tegin medısınalyq kómektiń sanatyna qosýǵa bolady. Sol kezde ınovasıalyq qurylǵyny qazaqstandyqtarǵa tegin ornatýǵa múmkindik bar.

Aıta ketsek, jeltoqsan aıynda álemdegi alǵashqy symsyz qanaınalym qurylǵysyn ornatý operasıasyn qazaqstandyq kardıohırýrgter komandasy men Chehıa, Izraıl, Italıa jáne AQSH seriktesteri birlesip Qazaqstanda jasaǵan bolatyn.

Usynǵan: Nazerke Labıhan