Qazirgi jastar Toqtar Áýbákirovteı batyr tulǵadan kóbirek úlgi alýy kerek. Qazaqtyń tuńǵysh ǵaryshkeri Toqtar Áýbákirovtiń til men eljandylyqqa qatysty ulaǵatty sózin Qamshy.kz aqparat agenttigi oqyrman nazaryna usynady.

«Otan» degen arǵy ýaqyttan kele jatyr, ol anamen teń. Otan – ana. Otandy satqanyń, anańdy satqanmen teń. Otanǵa erekshe mahabbat kerek. Mahabbat qyzǵa emes, erge emes, anaǵa qandaı mahabbat bolady, Otanǵa sondaı mahabbat qajet. Sonda tulǵa bolyp ósesiń. «Patrıotızm» sodan shyǵady. "Bireýdi meniń Otanymdy jamandady" dep sabaǵan patrıotızm emes. Onyń ereksheligi mynada jatyr dep túsindirý kerek. Ol úshin óz Otanyńdy qatty súıýiń kerek. Al ol qazirgi jastarda bul azaıyp barady. Patrıotızm qazirgi tańda biraz umytylyp qaldy. Sovet úkimeti kezinde  patrıottyq sezim saıasatpen birge edi.

Qasymyzdaǵy úlken Qytaıda mıllıardtan astam halyq bar. Solarǵa kishkentaı kezinen óz Otanyn súıý, óz jerin súıýdi uqtyrady, soǵan úıretedi. Al bizde ol mektepte de joq. Biraz aqshamyz paıda bolsa, júgirip aǵylshyn, nemis mektebine balamyzdy beremiz. Ózimizdiń mektepte óz tilimiz joqtaı! Ana tildi umytpaý kerek. Burynǵy ýaqyt ótti, ketti. Buryn aıtýshy edi «orys tilin bilmeseń, adam bolmaısyń» dep. Shyndyǵynda da orys tilin bilmeseń seni eshqandaı jerge almaıtyn, qara jumys bolmasa, basqasy jabyq bolatyn. Qazirgi ýaqytta biz ózimizdiń egemen memleketimizde, Qazaqstanda turyp jatyrmyz. Bizdiń sondyqtan patrıottyq sezimimiz oıanýy kerek. Óz tilimizben sóılep, ózimizdi maqtap, qaıda júrsek te, sony kóterýimiz kerek.

Kóshege shyqsaq qazaqsha sóıleýge uıalamyz. Oryssha sóılep ketemiz, aǵylshynsha sóılep ketemiz. Qazir jastar aǵylshyn tilin jaqsy, tamasha úırenýde. Durys. Adam bir tilmen ómir súre almaıdy. Jeti jurttyń tilin bilgen adam qaıda júrse de, ózin-ózi ustap júre alady. Biz sekildi bolmaıdy. Jastar ózge tildi bilýi kerek, biraq eń birinshi óz tilin jaqsylap ıgerýi tıis. «Patrıotızm» degen sol!