QR Aqparat jáne komýnıkasıalar mınıstri Dáýren Abaev 4 aqpan kúni oryn alǵan qazaly oqıǵaǵa baılanysty pikir bildirip, halyqtyń mınıstr Ábilqasymovanyń «otstavkaǵa ketýi» týraly talabyna jaýap berdi, dep jazady Qamshy.kz aqparat agenttigi.

«Bul – orny tolmas qaza. Bes balasynan birdeı aıyrylǵan ata-ananyń qazirgi jaǵdaıyn, tipti, elestetý múmkin emes. Búkil el birneshe kúnnen beri qaıǵyryp otyr», - deıdi mınıstr Abaev.

Óz sózinde aqparat mınıstri Dáýren Abaev áleýmettik jelide keńinen taralǵan mınıstr Ábilqasymovaǵa qatysty daýly pikirlerge kelispeıtinin aıtty.

«Barlyq kináni QR Eńbek jáne halyqty áleýmettik qorǵaý mınıstri Madına Ábilqasymovaǵa arta salý – ádiletsizdik.

Iá, eshkim de jaýapkershilikten qashpaýy kerek. Shyndyǵyn aıtsaq, bul elde qandaı jaǵdaı bolmasyn, olarǵa barlyq memlekettik apparat jaýaptymyz. Degenmen, Astanada bolǵan jantúrshigerlik oqıǵanyń birshama faktorlary bar ekenin umytpaýymyz kerek jáne barlyq másele Ábilqasymovanyń jumysyna qatysty emes.

Men Madına Erasylqyzyn bilemin, ol da áıel, ol da úsh balanyń anasy, sondyqtan bul oqıǵa onyń da júregin aýyrtqany sózsiz. Sondyqtan, men tek syndarly syn ǵana qalyp, ony qýdalaý toqtatylady dep senemin. Sondaı-aq, mınıstr Ábilqasymovany ózine senip tapsyrylǵan jumystarǵa beı-jaı qaramaıtyn óz isiniń mamany dep bilemin», - dep aıtyp ótti Dáýren Abaev.

Usynǵan: Nazerke Labıhan