Byltyr sybaılas jemqorlyqqa qatysy bolǵan 1 290 adamnyń áreketi áshkerelendi, dep habarlaıdy Qamshy.kz aqparat agenttigi Abctv.kz saıtyna silteme jasap.
Elimizde sybaılas jemqorlyqqa qatysty quqyq buzýshylyqtar sany tómendeýde. Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevtyń sózinshe, biraq bul tendensıa turaqty túrde jalǵasyp keledi. 2016 jylmen salystyrǵanda kórsetkish 23 paıyzǵa kemigen.
«Bul sybaılas jemqorlyqtyń aldyn alý boıynsha júrgizilip jatqan keshendi jumystyń jemisi», – deıdi agenttik tóraǵasy.
Derekterge súıensek, 2018 jyly sybaılas jemqorlyqqa barǵan 1 290 adamnyń áreketi áshkerelengen. Olardyń 25-i – respýblıkalyq deńgeıde, 91-i – oblystyq deńgeıde, 142-si qalalyq jáne aýdandyq deńgeıde ustalǵan adamdar.
«Byltyr uıymdasqan 4 qylmystyq top qyzmetiniń joly kesildi. Júıeli túrde oryn alǵan sybaılas jemqorlyqtyń 87 faktisi anyqtalyp, ol boıynsha 288 laýazymdy tulǵa qylmystyq jaýapkershilikke tartyldy. Memleketke keltirilgen zalal kólemi 21 mlrd teńgeni qurady. Onyń 89 paıyzy óndirilip alyndy», – dedi Alık Shpekbaev agenttiktiń alqa májilisinde.
Ótken jyly agenttik turǵyndarǵa kórsetiletin memlekettik qyzmettiń sapasyna baqylaýǵa erekshe nazar aýdarǵanyn jaqsy bilemiz. Bul rette, «Jasyryn satyp alýshy» tásili saladaǵy quqyq buzýshylyqtardy anyqtap, joıýǵa aıtarlyqtaı úles qosqan.
«Sondaı-aq, agenttik «Sıfrlyq agent» mobıldi qosymshasyn da iske qosty. Osylaısha, turǵyndar smartfonnyń kómegimen memlekettik mekeme usynatyn kez kelgen qyzmettiń sapasyna qatysty pikir bildire alatyn boldy. Munyń bári sybaılas jemqorlyq áreketin jedel anyqtap, zańǵa qaıshy qadamǵa barǵan memlekettik qyzmetshini jazalaýǵa múmkindik beredi», – deıdi agenttik tóraǵasy.
Sonymen qatar, 2018 jyldyń basynda «Qoǵamdyq baqylaý kartasy» ázirlendi. Bul joba kúndelikti qyzmet barysynda sheneýnikterdiń sybaılas jemqorlyqqa barmaýyn jáne olardyń jumysynyń sapasyn arttyrýǵa baǵyttalǵan. Ony qoldaný kezinde azamattardyń áleýmettik jeliler men call-ortalyq arqyly jibergen ótinishteri boıynsha halyqtyń áleýmettik kóńil-kúıine áser etetin 2,2 myńnan astam másele sheshildi», – dep tolyqtyrdy sózin Alık Shpekbaev.
Onyń aıtýynsha, agenttikti ońtaılandyrý jáne búdjet shyǵyndaryn qysqartý jumystary bıyl da jalǵasady. Eske sala keteıik, byltyr agenttiktiń ortalyq apparat qyzmetkerleriniń sany úshten birge deıin qysqartylǵan bolatyn.
«Endi tek eń tıimdi mamandardy qaldyrý arqyly bul kórsetkishti 40 paıyzǵa deıin jetkizip, olardyń aqshalaı úlesin arttyrý kózdelýde», – dedi agenttik tóraǵasy.
Sondaı-aq agenttiktegi 254 basshylyq laýazym qysqartylyp, artyq qurylymdar joıyldy. Osylaısha, sybaılas jemqorlyqqa qarsy qyzmet ókilderiniń eńbekaqysy Shyǵys Eýropa elderiniń deńgeıine deıin jetkizildi.
«Únemdelgen ár teńge syılyqaqylar men járdemaqylar tólenetin «jınaq shotqa» jiberiledi», – dedi ol.
Alqa májilisinde Alık Shpekbaev birqatar bastamanyń shetin shyǵardy. Máselen, ol Ý-083, Ý-086 medısınalyq anyqtamalarynan bas tartýǵa bolatynyn aıtty.
«Sońǵy ýaqytta atalǵan anyqtamalardy jınaý kópshiliktiń narazylyǵyn týdyra bastady. Óıtkeni bul qujattar sheshim qabyldaýǵa eshqandaı áser etpeıdi. Sondaı-aq, osyndaı anyqtamalardy satý beleń alyp keledi. Mundaı qujattardan esh qıyndyqsyz-aq bas tartýǵa bolady», – deıdi agenttik tóraǵasy.
Budan bylaı qajetti quzyreti men tájirıbesi bar kez kelgen adamnyń Ulttyq búroda qyzmet etýge degen múmkindigi artatyn boldy. Óıtkeni, sybaılas jemqorlyqqa qarsy qyzmettegi barlyq bos laýazymǵa ashyq konkýrs ótkiziledi.
Jalpy, quqyq qorǵaý organdarynyń qyzmeti ákimshilik memlekettik qyzmet standartyna jaqyndap keledi.
«Quqyq qorǵaý organdaryndaǵy qyzmetke úmitkerler irikteýdiń alǵashqy eki kezeńin bizdiń agenttikte ótedi. Sońǵy eki jylda 73 myńnan astam adam zańnamany bilýge arnalǵan testileýge qatysty. Olardyń tek onnan tórteýi ǵana irikteýden ótedi. Al quqyq qorǵaý organynyń ózinde ótetin suhbatqa tek daıyndyǵy jaqsy jáne qabiletti úmitkerler ǵana barady. Bul óz kezeginde eń kóp syn aıtylatyn polısıa qyzmetine sátti jańartý júrgizýge múmkindik beredi. Búginde quqyq qorǵaý jáne sot organdarynda sybaılas jemqorlyqqa qarsy baǵyttalǵan sharalar kúsheıtilýde», – dedi Alık Shpekbaev.
Agenttik tóraǵasy "memlekettik qyzmette «minsiz bedel» túsinigin engizý qajet" deıdi. Sonda memlekettik qyzmetshilerdiń etıkalyq quqyq buzýshylyqtary azaıa túspek. Máselen, sońǵy tórt jylda etıkalyq quqyq buzýshylyqtar sany eki ese azaıǵan. Eske sala keteıik, 2015 jylǵy 746 etıkalyq quqyq buzýshylyq oryn alsa, byltyr 353 buzýshylyq tirkelgen.
«Óz qatarymyzdaǵy adamdardyń tazalyǵy – jumysymyzdyń negizgi qaǵıdasy. Ótken jyly agenttiktiń, Ulttyq búronyń jáne Memlekettik basqarý akademıasynyń 7 qyzmetkeri qylmystyq qýdalaýǵa ushyrady. Búginde olardyń 5-i sottaldy. Mundaı jaǵdaılardy joıý úshin sybaılas jemqorlyqqa qarsy turaqtylyq boıynsha júıeli túrde arnaıy tekserýler júrgizý kerek. Tájirıbe sátti júzege assa, ony basqa da quqyq qorǵaý organdarynda paıdalanatyn bolamyz», – dedi Alık Shpekbaev.
Usynǵan: Nazerke Labıhan
