Jıyrma jyl buryn qaıtys bolǵan bala óliminiń qupıasy ashyldy dep jazady Qamshy.kz aqparat agenttigi wcpo.com saıtynyń deregin negizge alyp. 

1998 jyly AQSH-tyń Soltústik Korolına shtatynda 10 jastaǵy balanyń máıiti tabylǵan. Bul qylmystyń shyndyǵy araǵa 20 jyl salyp ashyldy. 

Balanyń máıiti buzylyp ketkendikten polısıa qyzmetkerleri der kezinde onyń kim ekenin anyqtaı almaǵan. Sondaı-aq onyń syrtqy beınesi joǵalǵan balalardyń da sıpattamasyna sáıkes kelmepti. 

Bıyl bet-álpetin qalpyna keltirý tehnologıasy men DNK-ny salystyrý arqyly balanyń kim ekeni anyqtaldy. Qaıtys bolǵan balanyń aty-jóni — Robert  "Bobbı" Adam Ýıt eken. Ol Mıchıganda týǵan, biraq Ogaıo shtatyndaǵy Orab taýly aımaǵynda ósken. Bul týraly seısenbide Orındj okrýginiń sherıfi Charlz Blekvýd málimdedi.  Araǵa biraz ýaqyt salyp balanyń máıitinen 350 shaqyrym jerden taǵy bir adamnyń denesi tabyldy. Ol máıit Bobbıdiń anasy Meng Hva Cho bolyp shyqqan. 

Tergeýshiler birden Bobbı men Mengtiń týǵan-týysyn izdeı bastaıdy. Olardyń týystarynyń biri jaı qyzyǵýshylyqpen DNK tapsyrady. Biraq ol mundaı sumdyq jaıtty estımin dep oılamaǵan. 20 jyl burynǵy oqıǵany estigen týystary abdyrap qaldy. Sebebi olar Meng pen Bobbıdi tarıhı otany Ońtústik Koreıaǵa ketti dep oılaǵan. Sol sebepti eshkim olardyń joǵalǵany týraly aryz bermepti. 

"Bobbı óte súıkimdi bala edi. Únemi kúlip júretin", dep eske aldy týystary. 

Olardyń ólimine kináli qylmysker 20 jyldan keıin tabyldy.  Qandyqol qylmysker Bobbıdiń ákesi bolyp shyqty, ol qylmysyn jasyrý úshin jurtqa áıeli men ulynyń aıaq astynan elden ketip qalǵanyn aıtqan. Qazir ol adam tonaǵany úshin túrmede otyr eken. Kúdikti kinásin moıyndady.  

Aýdarǵan: Ásel Bolatqyzy