Belgili kompozıtor ári dombyrashy Asylbek Eńsepov MS Saılaýbekpen kelisimshartqa otyrǵany týraly áńgimeni joqqa shyǵardy. Bul týraly ol ZTB.kz basylymyna bergen suhbatynda aıtty.
"Saılaýbek ekeýmizdiń birge túsken sýretimiz Internetke shyqqannan bastap barlyǵy bizdi birge jumys isteıtin boldy nemese meni Saılaýbekke prodúser boldy dep jatyr. Biraq bul olaı emes. Men onymen Atyraýdaǵy jergilikti meıramhanalardyń birinde kezdesip qaldym. Osy kúni ushyp ketýim kerek edi, soǵan deıin dostarymmen birge tamaqtanyp otyrǵanmyn. Saılaýbekti kóp adamdar baıqapty, onyń ishinde Qazaqstanǵa belgili taekvondoshy Arman Shilmanov ta bar. Bizdi tanystyrǵan sol. Jigitter Saılaýbekke endi ishimdik ishpeýge kómektesip, taza kıimder satyp ápergen. İshimdik ishken kezde ony keıbir adamdar uryp, jaǵdaıyn paıdalanǵan. Saılaýbek óte jaqsy ári zıaly adam bolyp shyqty. Ol mektepti qyzyl dıplomǵa bitirgen. Tek ómirindegi keı qıyndyqtarǵa baılanysty osyndaı jaǵdaıǵa túsken. Onyń ınternet juldyzy bolýy tegin emes. Men oǵan jańa ómir bastaýyna múmkindik baryn, barlyǵy úshin shúkirshilik etý kerektigin aıttym. Onyń vıdeosyn alǵash kórgenimde qazaq balasynyń osyndaı rıtmi baryna qatty qýndym. Bul barlyǵyna áser etti dep oılaımyn. Bizdiń yntymaqtastyǵymyz týraly eshteńe aıta almaımyn, sebebi men mýzykanyń basqa janrynyń ókilimin. Degenmen, naqty birdeńe deý qıyn. Bolashaqta seriktes bolýymyz múmkin, degenmen qazir emes", - dedi kompozıtor.
Ótken aptada Asylbek Eńsepov Instagram jelisindegi paraqshasyna MS Saılaýbekpen túsken sýretin jarıalady. Sonymen qatar, mýzykant osy adamǵa kómekteskenine qýanyshty ekenin jazǵan. Qoldanýshylar kompozıtordy Saılaýbekpen kelisimshartqa otyrdy dep, osy habardy áleýmettik jeli arqyly taratqan bolatyn.
Reper MS Saılaýbek aqpandaǵy ózi týraly YouTube portalyna shyqqan vıdeodan keıin tanymal bolyp, áleýmettik jelilerde ol túsken beınerolıkter keń taraldy. Vıdeodan ishimdik iship alǵan er adamnyń túsiniksiz tilde rep aıtyp jatqanyn kórýge bolady. Osydan keıin onyń ánin óńdep, parodıa jasaıtyndar kóbeıdi.
https://youtu.be/GZAGtwlqS9w
kaz.tengrinews.kz
