Jastar teatry Uly Otan Jeńisiniń 70 jyldyǵyna oraı «Tyraý-tyraý, tyrnalar...» dramasyn usynady
Astana qalasynyń Jastar teatry 7 mamyr kúni M.Gorkııı atyndaǵy Memlekettik akademıalyq orys drama teatrynyń sahnasynda S.Júnisovtiń «Tyraý-tyraý, tyrnalar...» dramasynyń premerasyn ótkizedi.
Atalmysh spektákl Qazaqstannyń halyq jazýshysy, dramatýrg Sáken Júnisovtyń «Jaraly gúlder» týyndysynyń negizinde sahna tórine shyǵyp otyr. Spektákldiń qoıýshy rejıseri - Qazaqstannyń eńbek sińirgen qaıratkeri Nurqanat Jaqypbaı.
Jetpis jyl buryn Uly Otan soǵysynyń ákelgen taýqymeti balalardyń da arqasyna aıazdaı batqany aqıqat. Balanyń bári baqytty bolýy úshin jaralǵanymen, sol daq túspegen móldir álemdi sum soǵystyń yzǵary qaryp ótse, amalsyz eresekter kóterer zil batpan aýyrtpalyq, joqshylyq, ata-anasy, týǵanynan qapıada máńgilikke kóz jazyp qalý – balań tanymdy bir-aq sátte eseıtip jibereri sózsiz. Iá, olar surapyl soǵys balalyǵyn urlaǵan jaraly gúlder. Olar jylaıdy, qabyrǵasy qaıysa qaıǵyrady, biraq bir sátke de armanynan alystaǵan emes. Tyraýlap ushqan tyrnalar legine ún qatady, arman-tilegin joldaıdy, keleshekke zor úmitpen kóz tigedi. Baqyt bastaǵan jas jetkinshekterdiń halyq basyna qara bult úıirilgen qysyltaıań shaqtaǵy arman men úmitke toly ishki psıhologıalyq kúıin jiti saraptaǵan pesa balalyǵyn surapyl soǵys jalmaǵan býynnyń boıamasyz kúıin búkpesiz baıan etedi.
