Georgıı taspasyn kim taǵady? Óz basym olardy shartty túrde úshke bóler edim. Birinshi top - bilmeıtinder. Bul tóńirektegi daýdan habarsyz ánsheıin qaýym. Orysy bar, qazaǵy bar, basqasy bar, jaı jurt. Taspadan túk saıası astar izdemeıtin eń shoǵyry mol qaýym. Satyp aldy, tegin aldy, mekemesi mindettedi - taǵa saldy. Ekinshi top - eregiskender. Bular da asa saıasılanǵandar emes, ardagerlerge, soǵys qurbandaryna qurmet bildirgen túri. "Tyıym salypty" degen sózge qarsylasqan reaksıa. Bular negizinen, óz quqyn qorǵaýǵa umtylyp turatyn orystildi jurt. Sany birshama. Úshinshi top, ádeıi taǵatyndar. Saıası, separatıstik múddesi barlar. Bular óte sırek dep oılaımyn. Jáne olarǵa erýshiler de tym az sıaqty. Sondyqtan, georgıı taspasyn taǵýshylarmen ýkraın-grýzınderdeı radıkaldy kúresý kerek emes dep esepteımin. Qarsylyq - qarsylyqty týdyrady. Eregiskenderdi "ıdeınyılarǵa" aınaldyrýdyń esh qajeti joq tárizdi. Endi birneshe jylda ondaılar ózderi-aq mandyrap ketetinine senem... P.S. Al kók taspaǵa kelsek (osydan eki jyl buryn kók taspany "Saıası qýǵyn-súrgin qurbandaryn eske alý kúnine" arnap shyǵarýdy bastaǵan jandardyń biri bolsam da), dál Jeńis kúnine kók taspanyń tarıhı qatysy joq. Memleket óz ıdeologıasyn júrgizý úshin osyndaı sımvolıkany balama retinde oılap taýyp, taratqany jón de shyǵar... Alaıda, ázirge ondaı "qoshqar múıiz" lentochkaǵa shabytym oıanbaı turǵany. Keshirińizdershi...