Qazaq ádebıeti aýyr qazaǵa ushyrady. Asa kórnekti jazýshy Orazbek Sársenbaı dúnıe saldy. Marqummen qoshtasý erteń 7 mamyr kúni saǵat 10:00-de Ǵ.Músirepov atyndaǵy Qazaq Memlekettik Aakdemıalyq jasóspirimder men balalar teatrynda ótedi.

SÁRSENBAI ORAZBEK 1938 jyly 20 tamyzda Qyzylorda oblysy, Shıeli aýdany, «Jańa turmys» aýylynda dúnıege kelgen. 1962 jyly Qazaq memlekettik ýnıversıtetiniń fılologıa fakúltetin bitirgennen keıin, Shıelidegi orta mektepte qazaq tili men ádebıeti pániniń muǵalimi, respýblıkalyq jastar gazeti «Lenınshil jasta» ádebı qyzmetker, «Juldyz» jýrnalynda (1968–1973), «Qazaq ádebıeti» gazetinde (1974–1982) bólim meńgerýshisi, Qazaqstan Jazýshylar odaǵynda (1982–1986) ádebı keńesshi, 1987–1993 jj. «Jazýshy» baspasy¬nyń bas redaktory, «Óner» baspasynyń dırektory (1993–1995) bolǵan. 1996 jyldan beri «Qaınar» baspasynyń dırektory. Alpysynshy jyldardyń basynda baspasóz betterinde onyń alǵashqy óleńderi men áń-gimeleri jarıalanǵan. Kezinde «Lenınshil jas» gazetinde basylǵan «1961 jyl» atty pýblısısıkalyq dastany ádebı, saıası ortada úlken daý-damaı týǵyzyp, ádiletsiz synǵa ushyraıdy. Osy ýaqytqa deıin 20-ǵa jýyq kitaby shyqqan. Ol ár jyldarda V.Korolenko, V.Ivanov, F.Abramov, F.Iskander, t.b. ózge ult jazýshyla¬rynyń tańdaýly áńgimelerin qazaqsha sóıletken. «Quran Kárim», «Muhammed paıǵambarymyzdyń hadısteri», Qasıetti duǵalar», «Adal men aram», «Musylmandyq ádep sabaǵy», «Muhtasar», t.b. ondaǵan kitaptardy qazaqshaǵa aýdarý isine tikeleı aralasqan. O.Sársenbaı qalamynan týǵan áńgimeler negizinde «Dolana» atty («Qazaq¬fılm», 1981, rejıseri S.Narymbetov) kórkemsýretti fılm túsirilgen. Jeke-legen shyǵarmalary kópte¬gen shetel tilderine aýdarylǵan. «Ýáde» atty povester men áńgimeler jınaǵyna Qazaqstan Jazýshylar odaǵynyń M.Áýezov atyndaǵy syılyǵy (1987), al «Shamshyraq» romany úshin halyqaralyq «Alash» ádebı syılyǵy (1994), «Sheńber» romany úshin Qazaqstan Respýblıkasynyń Memlekettik syılyǵy berilgen (2000). «Qurmet», «Parasat» ordenderimen marapattalǵan.