Birneshe adamdy basyp óltirgen Gelenvagen júrgizýshisi sot aldyna keldi, dep jazady Qamshy.kz aqparat agenttigi  KTK arnasynyń málimetine súıene otyryp.

Almatyda Gelendvagen kóligimen 4 adamdy qaqqan júrgizýshige qatysty sot otyrysy bastaldy. Basty kúdikti  İlıas Kar alǵashqy sot prosesinde ózine taǵylǵan aıyptyń jartysyn ǵana moıyndady. 3 adamnyń ómirin jalmaǵan qaıǵyly oqıǵaǵa qatysty kýágerler shaqyryldy. 

Prokýrorlar İlıas Karǵa  2 bap boıynsha aıyp taqqan. Alaıda 33 jastaǵy kúdikti ishimdik iship, kólik tizgindedi degen aıyppen tolyq kelispeıdi.

"Óz aıybymdy ishinara moıyndaımyn. Mas boldy degen aıyppen kelispeımin. "Sonymen qatar, oqıǵa ornynan ketip qaldy" degen 374 bappen de kelispeımin. Men sol jerde boldym. Eshqaıda ketken joqpyn", - dep málimdedi İlıas Kar.

Jańa jyldyq otyrystan shyqqan İlıas Kar jol talǵamaıtyn kóligimen Abaı men Seıfýllınniń qıylysynda Mısýbısıdi búıirden soǵyp, qarsy jolǵa shyǵarady. Tergeýshiler onyń ishimdik iship, jyldamdyqty asyrǵanyn alǵa tartady. Sol kúni kúdiktiniń qasynda bolǵan týysy ony joqqa shyǵaryp otyr.

"Biz aldymen Jandosov-Aımanov kóshesindegi "Darhan" meıramhanasyna otyryp, túngi 1-den keıin jańa jyldyq otyrysty "Grand Operada" jalǵastyrdyq. İlıas múldem spırttik ishimdik ishken joq. Tilek aıtqanda tek kola ishkenin kórdim. Jalpy ol sońǵy 2 jylda múldem spırttik ishimdikten bas tartty. Sebebi, onkologıalyq aýrýdan emdelip Izraılge baryp kelgen", - deıdi kýáger, Kardyń týysy Talasan Qalı. 

Qaıǵyly oqıǵa 2018 jyldyń 29 jeltoqsanynda  tańǵy 5-ter shamasynda bolǵan. Sonyń saldarynan Mısýbısıdi tizgindegen júrgizýshimen qosa, belgili aktrısa Sholpan Elgezekova men onyń qurbysy qaıtys boldy. Apattan tiri qalǵan tórtinshi adam em qabyldaýda.

Marqum Sholpan Elgezekovanyń anasy sottan aıyptalýshyǵa eń aýyr jaza taǵaıyndaýdy surady. 

"Meniń balapanymdy basyp óltirgen adamdy keshirmeımin. Ondaı adamǵa keshirim bolmaıdy. Bir emes, úsh adamdy óltirip otyr. Men 40 kún jyladym. Sóıtip kózimnen aıyryldym. Qazir bir kózimnen jas múldem toqtamaıdy", - deıdi aktrısanyń anasy Gúljahan Zamanbek.

Usynǵan: Nazerke Labıhan