Astanada 4 aqpan kúni bolǵan jantúrshigerlik oqıǵada bir úıdiń 5 qyzy tirideı órttiń qursaýynda qalǵan bolatyn. Kóktal aıdanynda bolǵan bul qazaly oqıǵa búkil jurtshylyqty eseńgiretip, qabyrǵasyn qaıystyrdy, dep jazady Qamshy.kz aqparat agenttigi.

Nazgúl Maǵjan esimdi jeli qoldanýshysy óziniń paraqshasynda 5 qyzynan aıyrylǵan otbasynyń kórshileri de tilsiz jaýdyń saldarynan baspanasyz qalǵanyn jazady. Taǵy bir kóp balaly otbasynyń páteri órtke oranyp, úıdiń tek tórt qabyrǵasy ǵana qalǵan.

Svetochnaıa degen kóshede ornalasqan bul úıde 4 balasy bar otbasy turatyn. Órt shyqqan kezde úıdegi adamdar syrtqa shyǵyp úlgergen. Otqa oranǵan úıdi qaıtadan qalpyna keltirý múmkin emes.

«Órt sóndirýshiler otty túngi saǵat 1:00 shamasynda óshirip bitti. Úıdiń tóbesi tolyqtaı janyp ketken, tek qabyrǵalary ǵana qaldy. Balalarymmen túnniń ortasynda kóshede qaldyq, barar jerimiz joq. Sharasyzdyqtan meni úreı basty. Densaýlyǵym nasharlap, esimnen tanyp qyldym. Kórshiler jedel járdem shaqyrtypty», - deıdi 4 balanyń anasy Venera Nurqasymova.

Qazir bul otbasyǵa kórshileri kómek berip, bos vremánkaǵa kirgizgen. Árıne, ýaqytsha...

Nurqasymovtar otbasy jaǵýǵa jaramdy zattardy alyp kelip, qys bastalǵaly ot jaǵylmaǵan vremánkany jylytýǵa tyrysýda.

«Janyp ketken úıimizdi qalypqa keltirý múmkin emes. Qazir ýaqytsha osy vremánkany panalap otyrmyz, biraq bul úıdiń peshi tym qaýipti ári eski», - deıdi Venera.

Balalarynyń úlkeni 14 jasta, ortanshylary 9 jáne 7-de bolsa, eń kenjesi 5 jasta eken. Órt bolǵan kúnge deıin balalar úılerinde jalǵyz qalyp otyrypty, al ata-anasy jumysta bolady eken.

Venera Nurqasymova «Qazposhta» bólimshesinde operator bolyp jumys isteıdi, qazir ol ýaqytsha demalysqa shyǵýǵa sheshim qabyldady. Sebebi, qazirgi baspanalarynda balalardy jalǵyz qaldyrý asa qaýipti bolyp otyr.

Al kúıeýiniń aılyq tabysy – 75 myń teńge, bul qarajattyń jańa úı alyp nemese ony salýǵa jetpeıtini belgili.

-Qazir de qaıyrymdy jandar bar, olar bizge kıim-keshek pen tamaq ákelip berip jatyr. Alǵysym sheksiz, ol adamdarǵa. Biraq, baspana máselesin qazir qatty ýaıymdap júrmin. Qazirgi vremánkada ár kúnim qorqynyshpen ótýde. Eń bastysy – qaýipsiz baspana bolsa eken deımin», - deıdi 4 balanyń anasy.

Usynǵan: Nazerke Labıhan