Amerıkanyń ataqty mıllıarderi, qarjyger maman Djordj Soros «Eýropa, oıan!» atty maqalasynda «qart qurlyqtyń» basshylaryn sheshim qabyldaýda muqıatty bolyp jáne onyń oryndalýyn qatań baqylaýǵa shaqyrdy.

–Eýropa óziniń myqty memleketterdiń jıyntyǵy ekenin esten shyǵaryp barady. Ázirge bárine de múmkindik bar, áli kesh emes. Sondyqtan Eýropa oıanýy qajet, olaı bolmaǵan jaǵdaıda EýroOdaq 1991 jylǵy SSRO-nyń kebin kıedi de, qurdymǵa ketedi. Bizdiń qarapaıym adamdar da, memleket basshylary da tez sheshim qabyldaıtyn kezeń kelgenin áli túsinbeı otyr,–deıdi Djordj Soros.

Óıtkeni EýroOdaqty ydyratýǵa jumys istep otyrǵan arnaıy kúshter jeterlik. Olar qazirgi ýaqytta barynsha aǵartý jumystaryn júrgizýde. Tipti Eýropanyń ózinde birigýdi qalamaıtyn tulǵalar barshylyq. Sondyqtan ony ydyratyp almaý jaǵyn barynsha oılaǵan durys.

Ataqty qarjyger mamannyń aıtýyna qaraǵanda, «EýroOdaqty saqtap qalatyn sheshýshi kezeń – 2019 jyl. Óıtkeni ústimizdegi jyldyń mamyr aıynan bastap, Eýroparlamentke saılaý bastalady. Onyń ústine áli de eýropalyq baǵyt ustanǵan jáne oǵan qarsy toptar jeterlik.

–Sondyqtan da birinshiden eń úlken qaýip-qater tóndirip turǵan Eýropany ishki jáne syrtqy jaýlardan saqtaý kerek. Ekinshiden, EýroOdaqtyń negizin ustap turǵan qundylyqtardy saqtap qalý qajet,–deıdi mıllıarder Djordj Soros.

Rasyn aıtý kerek, álemge aqyl aıtyp otyrǵan Sorostyń ózine de syn aıtýshylar qazir jeterlik. Keıbir sarapshylar «álemdegi kóptegen elderde memlekettik tóńkeris jasaýǵa Sorostyń tikeleı yqpaly bolǵan» degendi aıtady. Muny qarjyger ózi de joqqa shyǵyrmaıdy. Bir ǵana mysal, 2004 jyly Ýkraınadaǵy «qyzǵylt-sarylar» tóńkerisi bolyp, memleket basyna Vıktor Iýshenko, odan keıin 2014 jyly Kıevte qaıtadan «evromaıdan» oryn alyp, bılikke amerıkashyl  Petr Poroshenko keldi. Ýkraına prezıdenti Petr Poroshenko «ýkraın memlekettiligin qalyptastyrýda aıryqsha eńbek sińirgeni úshin Djordj Sorosqa «Azattyq» ordenin bergeni belgili.

Bir jaǵynan Poroshenko sıaqty bılik basyna kelgen múddeles adamdar ony jaqtap jatsa, ekinshi jaǵynan ony jaqtyrmaıtyndar da jeterlik. Mysaly, 2018 jyly Vengrıada ótken saılaýda eldiń premer-mınıstri Vıktor Orbon «eldiń ishki isine aralasty, keıbir saıası uıymdarǵa jasyryn qarjylaı kómek kórsetti» dep oǵan aıyp taqqany belgili.

Ras, kóptegen elderde demokratıany qarjylandyrý degen jeleýmen Sorostyń qory jumys isteıdi. Al onyń paıdasyn kórip jatqandar az. Al Sorostyń «Eýropa ydyrap ketýi múmkin» dep aldyn ala saqtandyryp otyrǵany beker emes. Qazirgi kezde Eýropa qurlyǵynda Reseıdi jaqtaıtyndar da barshylyq. Soros solar kóbeıip ketpese dep qorqady...