13 jasar Baqytjan órtenip jatqan úıden 2 balany qalaı qutqarǵanyn aıtty dep habarlaıdy Qamshy.kz aqparat agenttigi ult.kz saıtynyń deregin negizge alyp. 

Shymkentte órtenip jatqan úıden sábılerdi aman alyp qalǵan 13 jastaǵy Baqytjan Berkimbaı eki apta buryn qolyn syndyryp alǵan eken.

Baqytjannyń sózinshe, sol kúni ol kóshede kólikte otyrǵan. Kenetten kórshiniń Araı esimdi qyzy úılerinde  órt shyqqanyn aıtyp, kómek surap kelgen.

-Úıde anam bar edi. Biraq men oǵan aıtýǵa úlgermeı, dereý janyp jatqan úıge bardym. Qarasam úıdiń ishinde órt shyǵyp, jan-jaǵy janyp jatyr eken. Sol úıdiń 6 jasar qyzy men 3 jasar balasy bir shette qorqyp otyrdy. Tútinge tunshyqqan ba, áıteýir esinen tanýǵa shaq qalǵan. Dereý kishkentaıyn qolyma kóterip aldym da, úlkenin jetektep alyp shyqtym. Syrtqa shyqqan soń sý berip, kómektesýge tyrystym. Kórshiniń úıine alyp bardym. Anam qutqarý qyzmetine habarlasty. Keıin ata-analary da keldi, - deıdi jasóspirim búgin qalalyq TJD ótkizgen baspasóz máslıhatynda.

Búginde segizinshi synypta oqıtyn bala "otqa oranǵan úıge kirgen kezde qorqýǵa ýaqyt bolǵan joq,- deıdi. Óıtkeni ol mektepte sondaı daıyndyq sabaqtarynan ótkenin, sonyń arqasynda tezirek kómek kórsetýge umtylǵanyn aıtady.

Al, Baqytjannyń synyp jetekshisi bolsa, onyń tórt aǵaıyndy ekenin jetkizdi. 13 jastaǵy oqýshysy - úıdiń kenjesi. Synypta júrgende de tek jaqsy qyrymen tanylǵan.

-Baqytjan - óziniń dostaryna únemi qol ushyn berip júretin zerek bala. Baısaldy, meıirimdi, sabyrly minezi bar. Tárbıe saǵatyna da qatysýy jaqsy. Onyń bul jasaǵan erligi ózge oqýshylarymyzǵa da ónege bolyp otyr. Óıtkeni janyp jatqan úıge kirýge bala turmaq, eresekterdiń ózi bara bermeıdi, - deıdi Baqytgúl Lekerova.

Búgin jas qutqarýshyny qalalyq TJD basshylyǵy arnaıy alǵys hatpen marapattaldy. Sondaı-aq, departament bastyǵy Nurbolat Derbisov «Erligi úshin» medalimen marapattaý úshin elimizdiń İİM atyna jáne arnaıy alǵys hatpen marapattaý úshin qalalyq ákimdikke usynys joldanǵanyn jetkizdi.

-Baqytjan keleshekte bizge qutqarýshy bolyp keledi dep senemiz. Mundaı jigitterge biz arnaıy oqý ornyna barý týraly usynys aıtamyz. Biz úshin onyń der kezinde jasaǵan áreketi úlken erlik dep aıtar edim. Onyń ata-anasyna jáne ustazdaryna alǵys aıtamyn,- dedi Nurbolat Derbisov.

Órtke oranǵan úıdiń 7 jastaǵy qyzynyń aıtýynsha, alty jasar sińlisi men 3 jastaǵy inisi ottyqpen oınap otyrǵanda kórpe jana bastaǵan. Balalar ony ózderi óshirmek bolypty, biraq órt kúsheıip ketken.

Aıta keteıik, 16 aqpan kúni qaladaǵy Qursaı móltek aýdanynda jeke úıden órt shyqqan bolatyn. Onda qaraýsyz 3 bala qalǵan. Janyp jatqan úıde qalǵan eki balany sol mańda turatyn 13 jastaǵy Baqytjan Berkimbaı alyp shyqqan edi. Jasóspirimniń arqasynda eki búldirshin aman qaldy.

Usynǵan: Maqpal Sembaı