Memleket basshysynyń tapsyrmasyn júzege asyrý aıasynda Aqtóbe oblysynda jetim balalarǵa qatysty máseleler tıimdi sheshilýde. Aımaqta aǵymdaǵy jyldyń qańtar aıynda osydan 10 jyl buryn 585 bala turǵan jalǵyz balalar úıi jabyldy. Bul balalar úıiniń tárbıelenýshileri sanynyń kúrt tómendeýine baılanysty. Tek ótken jyly oblysta 128 bala otbasyna ornalastyryldy, onyń ishinde 85 bala qamqorlyqta jáne qorǵanshylyqta, 26 - bala patronattyq tárbıede, 17 – balany asyrap aldy, dep jazady Qamshy.kz aqparat agenttigi.
Aqtóbede jetimdiktiń aldyn alý, ómirde qıyn jaǵdaıǵa tap bolǵan balalardy qoldaý maqsatynda "Aıala" ortalyǵy ashyldy. Onda kámeletke tolmaǵandardy beıimdeý ortalyǵynyń 19 tárbıelenýshisi men Alǵa balalar úıiniń 14 tárbıelenýshisi ornalasqan.
Oblys ákimi Berdibek Saparbaev jańa mekemede bolyp, jetim jáne ata–anasynyń qamqorlyǵynsyz qalǵan balalardyń ómir súrý jáne tárbıelený jaǵdaıymen tanysty, ortalyqtyń basshylyǵymen, pedagogıkalyq ujymymen jáne tárbıelenýshilerimen kezdesti.
«Balalar - Qazaqstannyń bolashaǵy, sondyqtan biz, úlkender, sizderdi laıyqty tárbıelep, damytý úshin bárin jasaýymyz kerek. Bizdiń oblysta barlyq sharalar qabyldanyp jatyr. 2018 jyl «Baqytty bala» jyly bolyp jarıalandy. Sizder ata-anasyz qalǵandaryńyz úshin kináli emessizder. Biraq sizder ózderińizdiń qatarlastaryńyz sekildi jaqsy tárbıe men bilim alýǵa talpynýlaryńyz kerek. Eger sizder jaqsy oqyp, sportpen, ónermen aınalyssańyzdar, tárbıeli bolsańyzdar, ómirde mindetti túrde óz oryndaryńyzdy taýyp, Qazaqstannyń laıyqty azamaty bolasyzdar. Bizdiń maqsatymyz – sizderge barlyq jaǵdaıdy jasaý. Bolashaqta birde-bir bala memlekettiń qamqorlyǵynsyz jáne qoldaýynsyz qalmaýy tıis. Elbasynyń áleýmettik saıasaty osyǵan baǵyttalǵan», - dedi oblys basshysy ortalyqtyń tárbıelenýshilerimen áńgime barysynda.
Oblys ákimi mekemege sporttyq jattyǵý jabdyqtaryn syılap, balalarǵa syılyqtar men táttiler tabys etti.
Ortalyqta balalardy tárbıeleýge jáne oqytýǵa, bos ýaqyttaryn tıimdi uıymdastyrýǵa jáne medısınalyq, psıhologıalyq qoldaý kórsetý úshin qajetti jaǵdaılar jasalǵan. Balalarǵa mamandyq tańdaýda, óz betinshe ómir súrýge daıyndalýda pedagogtar men psıhologtardyń kómegi kórsetiledi. Ortalyqqa 3 jastan 18 jasqa deıingi balalardy qabyldanady.
2017 jyly Aqtóbede «Sábı» qaıyrymdylyq qorynyń qarajatyna salynǵan «Meıirim» áleýmettik beıimdeý ortalyǵy óz jumysyn bastady. Búginde Qazaqstanda balamasy joq keshende balalar úıiniń 16 men 29 jas aralyǵyndaǵy 102 túlegi turady jáne sonda jumys isteıdi. 3 gektar jer telimine alańy 43 sharshy metr bolatyn, jańa jıhazdarmen jáne qajetti komýnıkasıalarmen jabdyqtalǵan jaıly pátreleri bar tórt eki qabatty týnhaýs salynǵan.
Keshen aýmaǵynda oqý-óndiris alańdary, shashtaraz, gúl dúkeni, jylyjaı, etik jóndeý jáne tigin sehtary bar. Ol jerlerde tárbıelenýshiler kásipke oqytylyp, eńbekaqylaryn ala otyra jumys tájirıbesinen ótedi jáne eńbek ete alady. Investor jobany júzege asyrý úshin 1,4 mlrd teńge bólgen.
Sondaı-aq, «Baqytty bala» óńirlik jobasy aıasynda byltyr jergilikti bıliktiń qoldaýymen 136 jetim bala baspanaly boldy. Kásipkerler ata-ana qamqorynsyz qalǵan balalardyń turǵyn úı jınaq shotyna 80 mln teńgedeı aýdardy.
Búginde oblys boıynsha jetim jáne ata-ana qamqorynsyz qalǵan barlyǵy 1011 bala bar. Olardyń 799-y qamqorlyqta jáne qorǵanshylyqta, 106 bala patronattyq tárbıede, 106 bala otbasy tıpindegi nemese basqa da balalarǵa arnalǵan mekemelerde.
Usynǵan: Nazerke Labıhan
