2015 jyly Tájikstan prezıdentiniń rezıdensıasy eń ádemi rezıdensıa bolyp moıyndaldy. Bul tizimge Qazaqstan prezıdentiniń Aq Ordasy men Túrikmenstan basshysynyń «Oǵyzhan» saraıy da engen bolatyn. Olaı bolsa, Ortalyq Azıa prezıdentteriniń rezıdensıalaryna toqtalyp ótelik. Prezıdentter ol jerde jumys isteıdi, keıbiri turady.
Tájikstan
«Kohrı Mılat» saraıynyń qurylysy 2000 jyly bastalyp, 2008 jyldyń tamyzynda aıaqtaldy. Ol ýaqytta Dýshanbede Shanhaı Yntymaqtastyq Uıymynyń samıti ótip jatqan. Ǵımarat 6 qabattan turady, onǵa jýyq konferensıa zaly bar.
Ǵımarat ishinde qalaǵa qaraıtyn birneshe qysqy baq bar. Sonymen qatar rezıdensıa ishinde prezıdentke arnalǵan bólmeler men jattyǵý zaly bar.
Ǵımarat qurylysymen ıtalándyq Rizzani de Eccher kompanıasy aınalysty. Sol sebepti qurylys materıaldary kóbine Italıadan ákelingen. Máselen, eden men qabyrǵalar Carrerf atty ıtalándyq mármármen jasalǵan.
Kasrı Mıllatqa týrıser men qarapaıym azamattar kire almady, tek syrtynan baqylap kete alady. Onyń ózinde aýlasynan emes, ǵımaratqa qarama qarsy turǵan Rýdakı saıabaǵyna kóre alady.
Qazaqstan
Elbasy Nursultan Nazarbaevtyń rezıdensıasy álemdegi eń ádemi bestiktiń qataryna kirgen.
Rezıdensıa qurylysy 2001 jyly bastalyp, 2004 jyly aıaqtaldy. Bıiktigi – 80 metr, birinshi qabatynyń bıikti – 10 metr. İshinde 1800 sharshy metrdi quraıtyn ortalyq saltanat zaly, sonymen qatar qysqy baqtar men pres-konferensıalar ótetin zaldar bar. Al ekinshi qabatynda jumys isteıtin keńseler ornalasqan.
Úshinshi qabatynda halyqaralyq dárejedegi túrli sharalar ótedi. Sonymen qatar, memleket basshylary qujattarǵa qol qoıatyn Mármár zaly, kezdesýler ótetin Altyn zal, kelisimsharttar jasalatyn Sopaqsha zal bar. Buǵan qosa qonaqtar bólmesi, Qaýipsizdik Keńesiniń zaly, Shyǵys jáne ózge de túrli zaldar osy úshinshi qabatynda ornalasqan.
Sonymen qatar túrli memleketterdiń basshylaryna arnalǵan jınalystar ótetin Kúmbezdi zal da bar. Kitaphana men otyrys saǵattary ótetin zaldary da bar. Aq ordanyń ár zalynyń ózindik ereksheligi bar.
Aq Orda – jabyq ǵımarat. Prezıdent rezıdensıa ishinde bolmaǵan ýaqyttarda ekskýrsıalar bolyp turady.
Túrikmenstan
Gýrbangýly Berdimúuhamedovtiń «Oǵyzhan» saraıy alǵashqy prezıdenttiń rezıdensıasynyń janynda ornalasqan.
Rezıdensıa qurylysy úsh jylǵa jalǵasty. Bouygues fransýz kompanıasy qurylysyn 2011 jyly aıaqtady.
Ortalyq zaly qurmetti qonaqtardy qarsy alýǵa arnalǵan. Eki jaqty kelisimder Altyn zalda ótedi. Al keń kólemdegi kelisimder Gorký tata zalynda, úkimetaralyq kelisimder men qujattarǵa qol qoıý sharalary Seldjýk han zalynda, BAQ-qa arnalǵan pres-konferensıalar Baıran han, mádenı sharalar Mahtýmkýlı zalynda ótedi.
Ózbekstan
Ózbekstan prezıdenti Shavkat Mırzıeevtiń jańa rezıdensıasy Tashkent oblysy Baıturǵan aýylynda ornalasqan. Onyń qurylysy úshin ondaǵan úı qıratylyp, úı ıelerine kompensasıa tólengen. Kósheler keńeıtilip, aınalasyna shyrshalar otyrǵyzyldy.
Shavkat Mırzıeevtiń jańa rezıdensıasynyń aýmaǵy birneshe gektardan turady. Ǵımarattyń ishi argentınalyq kógildir mármármen ári Swarovski krıstalynan jasalǵan. Rezıdensıanyń qurylysymen Ózbekstan prezıdentiniń úlken kúıeý balasy Oıbek Týrsýnov aınalysty.
Al rezıdensıanyń ashylýy prezıdenttiń týǵan kúninde, ıaǵnı 2017 jyldyń 24 shildesinde ótti. Jańa rezıdensıa Mırzıeevtiń jumys ornynan 26,5 shaqyrym qashyqtyqta ornalasqan.
Qyrǵyzstan
Ala-Archa rezıdensıasy 2012 jyly salyndy. 2016 jyly TMD elderi basshylarynyń samıti úshin rezıdensıa ishinde Qabyldaý úıi ashyldy. Onyń dızaıny kıiz úıge uqsatyp jasalǵan. Aýmaǵy 1,5 myń sharshy metrdi quraıdy.
Ǵımarat eki deńgeıden turady. Ǵımarattyń tómengi qabaty eki jaqty kezdesýlerge arnalǵan úlken zaldan turady. Qabyldaý úıi 500-ge jýyq adamǵa arnalǵan. Onda túrli sharalar ótkiziledi. Máselen, resmı qabyldaýlar, jınalystar, pres-konferensıalar. Ǵımarat 8 tilde sınhrondy aýdarma jasalatyn kabınamen jabdyqtalǵan.
Memlekettik rezıdensıa aýlasynda Qyrǵyzstannyń eks-prezıdentteri Roza Otynbaeva men Almazbek Atambaev ta turady.
