Almaty oblysyndaǵy Túrgen aýylynyń turǵyny qaqaǵan aıazda paketke salynyp, qaqpada ilinip turǵan náreste oqıǵasy jaıly baıandap berdi. Kelinshek kishkentaı sábıdi qalaı taýyp alǵanyn jetkizdi dep habarlaıdy Qamshy.kz aqparat agenttigi Eýrazıa birinshi arnasynyń deregin negizge alyp.
Áıel adam bul kúndi máńgi esinde saqtap qalatyny sózsiz. Ol qaqpada ilýli turǵan qyzyl pakette bala jatyr dep múlde oılamaǵan.
«Paketti úıge kirgizdim de, asha bastadym. İshinen balanyń qoly shyqty. Men shoshyp kettim, ary qaraı asha berdim. Sharf qan-qan boldy. Sebebi, sábı jańa týylǵan», - dep esine aldy Sáýle.
Balanyń qasyna eshqandaı hat qaldyrmaǵan. Ol jup-juqa jazdyq oramalǵa oralypty. Sáýle birden jedel járdemdi shaqyrtqan.
Oqıǵa ornyna kelip jetken dáriger balanyń kindigin kesip, ony perzenthanaǵa alyp ketken. Dárigerlerdiń aıtýynsha, eger bala bul ýaqyttan kesh tabylǵan jaǵdaıda ony qutqarý múmkin emes bolatyn edi.
«Náreste qatty tońyp qalǵan. Asa aýyr deńgeıdegi gıpotermıa, dene qyzýy 32 gradýs», - dedi feldsher Aıbek Shirinov.
Ol sábıdiń ólim aýzynan aman qalǵanyn aıtady. Dúnıe esigin endi ashqan qyz sýyqtan kóz jumýǵa az qalǵan.
Perzenthana qyzmetkerleri náresteniń týyla bitken ınfeksıasy bar ekenin aıtty. Ol qazirgi tańda, barlyq qajetti emdi alyp jatyr. Dárigerlerdiń de oǵan qatysty boljamy jaqsy.
Tártip saqshylary bolsa sábıdiń anasyn izdestirip álek.
«Oqıǵaǵa qatysty sotqa deıingi tergeý jumystary júrgizilýde. İs Qylmystyq kodekstiń 119 baby boıynsha qozǵalǵan», - dedi Almaty oblysynyń polısıa departamentiniń resmı ókili Ernar Saıdildın.
Búgingi kúni náreste Esik perzenthanasynda jatyr. Onyń emi aıaqtalǵan soń balalar úıine jiberedi.
Usynǵan: Ásel Bolatqyzy
