Almaty ákimi Baýyrjan Baıbek kópbalaly analarmen kezdesti, olardyń barlyq suraqtary men usynystaryn jeke tyńdady, sonymen qatar megapolıstiń turmysy tómen kópbalaly otbasylaryna qoldaý kórsetý úshin qalalyq deńgeıde atqarylatyn áleýmettik sharalardy keńinen túsindirdi, – dep habarlaıdy Qamshy.kz aqparat agenttigi «Qazaq úni»aqparat agenttigine silteme jasap.

Buryndary mundaı kezdesýler barlyq aýdandyq ákimdikterde ótti, nátıjesinde aıtylǵan barlyq usynystar jınaqtaldy ári saralandy. Jalpy, kópbalaly analardy tolǵandyratyn basty máseleler – áleýmettik járdemaqy mólsherin arttyrý, turǵyn úı men turmystyq jaǵdaıdy jaqsartý, eńbekpen qamtý, balalardy bala baqshaǵa ornalastyrý jáne basqalary.

«Memleket basshysynyń tapsyrmasy boıynsha úkimettik top jumys isteýde, kezdesýlerde aıtylǵan barlyq usynystar saralanady jáne esepke alynady. Bulardan ózge, biz qalalyq deńgeıde kópbalaly analarǵa qoldaý kórsetýdiń naqtyly mehanızmi jınaqtalǵan pármendi sharalardy «Nur Otan» partıasynyń kezekten tys konferensıasynda ashyp aıttyq. Mysaly, kámeletke tolmaǵan 4 jáne odan da kóp balalary bar turmysy tómen otbasylarǵa turǵyn úı alýdyń alǵashqy jarnasynyń tólemin sýbsıdıalaý múmkindigi qarastyrylatyn bolady», – dedi Baýyrjan Baıbek.

Turmysy tómen kópbalaly otbasylarǵa qoldaý kórsetýdiń keshendi sharalary boıynsha múgedek balany úıde oqytýǵa ketetin shyǵynnyń ornyn toltyrý úshin beriletin adrestik kómek pen qıyn ómirlik jaǵdaı týyndaǵan kezde bir ret kórsetiletin áleýmettik kómek kólemin arttyrý josparlanǵanyn atap ótýge bolady.

Aıta keterligi, Baýyrjan Baıbek buryndary turmysy tómen kópbalaly otbasylardyń ekinshi balasynan bastap bala baqsha shyǵynyna ótemaqy tóleýdi qarastyrýdy tapsyrǵan bolatyn. Kópbalaly otbasylardyń komýnaldy qyzmetke, sýmen qamtýǵa qatysty ystyq jáne sýyq sý eseptegish qondyrǵylaryn ornatýǵa ketken shyǵyndaryna jumsalatyn adrestik kómek kólemi de nazarǵa alynýda.

Kóp balaly otbasylardyń zańnamalyq jáne psıhologıalyq keńesterge zárý ekeni belgili, sondyqtan taıaý arada «Baqytty otbasy» qalalyq jobasy iske asady jáne osy attas kópbalaly analar ortalyǵy qurylady. Bul bir tereze qaǵıdasy boıynsha jumys isteıtin servıstik ortalyq bolady jáne munda kópbalaly analar jumysqa tartylady.

Almaty ákimdigi turmysy tómen otbasylar úshin áleýmettik jumys oryndaryn ulǵaıtý jáne stıpendıa beriletin tegin qysqa merzimdi kýrstar uıymdastyrý mumkindigin qarastyrýda. Buryndary Baýyrjan Baıbek Almatyda negizsiz shyǵyndardan arylýdy usynǵan edi.

Qala basshysy áleýmettik sıpaty bar sheshimder qabyldaý úshin Almaty ákimdiginiń «Nur Otan» partıasy fraksıasynyń múshelerimen birge búdjet shyǵyndaryn turaqty tekserip, ońtaılandyrý júrgizgenin aıtty. Nátıjesinde únemdelgen qarjy burynǵydaı azamattardyń ótinishi boıynsha áleýmettik máselelerge jumsalady. Olar – jańa jumys oryndaryn qurý, turmysy tómen jandarǵa, ásirese kóp balaly analarǵa qoldaý kórsetý spektrin ulǵaıtý, basqa áleýmettik sharalardy júzege asyrý.

Usynǵan: Maqpal Sembaı