Bir aıǵa jýyq ýaqyt boldy, Venesýelada qos úkimet bıligin júrgizip tur. Qozǵalystyń bir jaǵynda Ulttyq Assambleıanyń tóraǵasy, AQSH-tyń qoldaýymen basshy bolǵan Hýan Gýaıdo, al ekinshi jaǵynda eldiń qazirgi prezıdenti Nıkolas Madýro tur. Biraq  bir aı ýaqyt ótse de,  jaǵdaı sheshilgen joq, tartys órship barady.

23 aqpan Venesýelanyń taǵdyry sheshiletin kún. Óıtkeni aldyn ala jetken málimetterge qaraǵanda, AQSH 23 aqpan kúni Venesýelaǵa gýmanıtarlyq kómek retinde aýyr mashınalardyń kóshin kirgizbek. Al Madýro AQSH tarapynan jiberilgen kómekti qabyldaýǵa qarsy. Tipti aýyr kólikpen keletin joldardyń barlyǵyn da japty. Madýronyń buıryǵymen 15 myń sanaıper qazir oqý atýǵa daıyn tur. Keshe óziniń jaqtastary aldynda sóz sóılegen Nıkolas Madýro «ash qalsaq ta, AQSH-tan kómek almaımyz» dep málimdeme jasady. Sonymen qatar, búkil el halqyn kóshege mıtıńke shyǵýǵa shaqyrdy. Ótken aptada eldegi jaǵdaıdy bilýge kelgen Eýroparlamenttiń bes depýtatyn ishke kirgizbeı Nıkolas Madýro shekaradan keri qaıtaryp jiberdi.

Al Batys elderi men AQSH-tan jetken kómek qazir Brazılıa men Kolýmbıanyń shekarasynda tur. Opozısıa saılaǵan prezıdent Hýan Gýaılo «qandaı jaǵdaıǵa qaramastan  shekarada turǵan gýmanıtarlyq kómekti ishke kirgizýge atsalysatynyn» jetkizdi.

–Meniń jaqtastarym da túgel kóshege shyǵady. Kómekti taratýǵa eriktiler jasaqtalyp jatyr. Bizge azyq-túlik kerek. Áıtpese, Venesýela halqy ashtan óledi. Qaıyrymdylyq pen qamqorlyqtan bas tartpaýymyz kerek,-dep málimdedi ózin-ózi prezıdent etip jarıalaǵan Hýan Gýaıdo.

Anyǵyna kelsek, Gýaıdo kimge senip otyr? Árıne, eń aldymen, AQSH-qa!

Dúısenbi kúni Donald Tramp AQSH-taǵy Venesýela dıasporasynyń aldynda sóz sóılep, «eger Nıkolas Madýro beıbit jaǵdaıda bılikti ótkizbese, onyń saldary aýyr bolatynyn» aıtty.

–Eger olar osy joldy tańdasa, onda olar barlyǵynan da aırylady. Tipti tyǵylatyn jertóle de tappaı qalatyn bolady. Sondyqtan oılanýǵa bir-eki kún ǵana qaldy»,– dedi Donald Tramp.

Keıbir derekterge qaraǵanda, Venesýelaǵa áskerı joryq jasaýǵa AQSH tarapynan qatty daıyndyq sharalary júrgizilip jatqanǵa uqsaıdy. Keshe birqatar BAQ osydan bir apta buryn Venesýelamen shekaralas memleketterge transporttyq-áskerı ushaqtar jetkizilgenin málim etti. Ázirge ekinshi prezıdent Hýan Gýaıdonyń jaǵyna eki áskerı general ǵana ótken. Biraq olardyń qaramaǵynda eshqandaı armıa joq. Al ásker tolyqtaı Nıkolas Madýronyń buıryǵyn kútip tur. Biraq AQSH pen onyń odaqtastarynyń qysymy kún ótken saıyn kúsheıip barady. Al Madýrony jaqtap otyrǵandar – Reseı, Meksıka, Bolıvıa, Kýba jáne Qytaı.

...Bul Madýro men Gýaıdonyń ǵana emes, alpaýyt memleketterdiń de taıtalasy.