Almaty qalasynda kómekke muqtaj kóp balaly otbasylardyń páter alýyna múmkindik jasaıtyn turǵyn úı baǵdarlamasyn iske qospaq dep habarlaıdy Qamshy.kz aqparat agenttigi.

Baıbektiń aıtýynsha, sońǵy eki aptada ákim 600 anamen kezdesken.

«Júzdegen suraqtar saraptaldy, olardyń eń ózektisi – turǵyn úı, komýnaldyq qyzmet, járdemaqy máselesi jáne oqý men jumysqa ornalasý. Analardyń barlyq usynysy Úkimetke jiberildi.

Alaıda ákimshilik te qur qarap otyrmaıdy. Almatyda «Baqytty otbasy» atty áleýmettik turǵyn úı baǵdarlamasy iske qosylady.  Ár kóp balaly otbasy úshin qala ákimshiligi 1 mln teńgelik turǵyn úı sertıfıkatyn úılestiredi.

Alǵashqy jarna páter baǵasynyń 10 paıyzyn quraıdy. 2 paıyz ústememen 18 jylǵa alady. Sońǵy eki jylda biz «Almaty Jastary» baǵdarlamasyn sátti iske asyrdyq. 10 mln teńgege deıingi 238 páterdi rásimdeldi. Iaǵnı, bul máselede tájirıbemiz mol», - dedi Baýyrjan Baıbek.

Nesıe quny 15 mıllıon teńgeden aspaıtyn jańadan salynǵan úıler úshin beriledi.

Bıylǵy jyly Alataý jáne Naýryzbaı aýdandarynan 500 páter ótkizý josparlanyp otyr. Al aldaǵy 5 jylda 23 myńǵa jýyq páter salynady.

Baıbektiń aıtýynsha, sońǵy 3 jylda 10 myńǵa jýyq almatylyq otbasyna jańa páterdiń kilti tabystaldy. Olardyń ishindegi 1356 páter qalalyq turǵyn úı qorynan bólindi, 8 myńy jeńildetilgen ıpotekamen berildi. 40 paıyzǵa jýyǵy áleýmettik jaǵdaıy tómen jandarǵa berildi: 2375 páter kóp balaly otbasylarǵa, 564 páter múmkindigi shekteýli jandarǵa, 345-i jetim balalarǵa jáne 165 páter zeınetkerler men ardagerlerge berildi.