Alaıaqtyq áreketi úshin ustalǵan Tımýr Aıdarbekov belgili rejıser Emır Baıǵazınniń «Úndestik sabaqtary» fılminde basty róldi somdaǵan.

Ol oqýshylardy aldaǵany úshin isti boldy. Bir jaǵdaıda  "vıdeo júktep alamyn" degen jeleýmen 15 jastaǵy oqýshydan noýtbýk alyp shyǵýyn suraǵan. Osylaısha balany aldap dúkenge kirip ketip, dúkenniń arǵy esiginen shyǵyp ketken. Noýtbýkty 15 myń teńgege satyp jibergen. Taǵy birde qyz balanyń telefonyn aldap alyp ketken.

Jas akter  balalar úıinde ósken. Balanyń boıyndaǵy talantty arthaýs janrynyń rejıseri Emır Baıǵazın baıqaǵan. 13 jasynda Tımýr Aıdarbekov «Úndestik sabaqtary», odan keıinirek «Jaraly perishte» fılmderinde oınaǵan.

Eki kınotýyndynyń ekeýi de kóptegen álemdik kınofestıvalderde top jardy. Jas akter 2013 jyly Fransıanyń Amen qalasynda ótken 33-halyqaralyq kınofestıvalde eń úzdik erler róli úshin marapat alǵan.

Emır Baıǵazınmen birge qyzmet isteıtin qoıýshy-sýretshi Sergeı Kopylov eki kartınaǵa da rejıser ómirdiń qıyndyǵyn kórgen jastardy izdegenin aıtty. Olar Tımýr Aıdarbekovty balalar úıinen tapqan.

«Úndestik sabaqtaryn» túsirgen kezde Baıǵazınmen jumys istemedim. Men «Jaraly perishte», «Juldyzdarǵa qaraǵyńyz kele me?» kınolarynda birge boldym. «Jaraly perishtede» Tımýr toksıkomandy oınaıdy. Men onyń taǵdyry qıyn dep estigenmin. Internatta ósken. Ol – óte pysyq bala. Túsirilim jumystary bitken soń da, 2 aptadaı jaryqtandyrýshy bolyp jumys istedi. Sosyn ol joǵalyp ketti. 2017 jyly «Juldyzdarǵa qaraǵyńyz kele me?» fılmine túsirý úshin shaqyrdyq.  Aldyn ala túsirilimderge kelip júrdi. Keıin taǵy joǵalyp ketti. Bilýimshe, ol ınternatta burynnan beri turmaıdy», – dedi Sergeı Kopylov.

2014 jyly 17 jastaǵy Tımýr Aıdarbekov ınternattan qashyp ketpek bolǵan. Birneshe ret qashýǵa tyrysqany úshin tárbıesi qıyn balalardy beıimdeý ortalyǵyna tústi. «Ol «Jaraly perishtede» túsip júrgende qashyp ketken. Ony Tarazdan taýyp aldy. Minezi óte qıyn bala. Tárbıege kónbeıtin. Betine tatý jasaǵany jaıly estidim. Qolynyń jymsymasy baryn burynnan bilemiz. Sodan qaıtyp ákelmedi. «Qazaqfılmde» de bireýdiń telefonyn suraı turyp, sol beti qaıtarmady. Onyń akterlik potensıaly myqty bolatyn. Biraq, aıaq astynan joǵalyp ketetin adammen jumys isteý múmkin emes», – dedi ol.

Aıta ketý kerek,  «Úndestik sabaqtary» fılmi halyqaralyq kınofestıvalderden 1 jylda 30-ǵa jýyq júlde alǵan. Fılm qazaq kınosynda tuńǵysh ret eń joǵarǵy «A» sanatyndaǵy Berlın kınofestıvaliniń baıqaý baǵdarlamasyna qatysyp qana qoımaı, odan «Kúmis aıý» júldesin oljalaǵan. Bul fılmniń prokaty Qazaqstanda 5 jeltoqsanda bastaldy.

Derekkóz: inform.kz

Usynǵan: Maqpal Sembaı